«Барселона» Испания кубоги ярим финали йўлланмасини қўлга киритди. Каталонияликлар икки ўйин натижасига кўра (4:2) «Атлетико»ни мусобақадан чиқариб юборди, деб хабар бермоқда «Stadion.uz».
«Камп Ноу»да бўлиб ўтган ўйинда «Барселона» Мессининг голи эвазига минимал ҳисобда ғалаба қозонгани боис Симеоне шогирдлари ўз уйидаги ўйинда дарвоза дахлсизлигини сақлаган ҳолда «Барселона» дарвозасига 2 та гол уриши керак эди. Макеранонинг хатосидан сўнг Фернандо Торрес ўйиннинг 30-сониясидаёқ гол уриб, икки ўйн натижасига кўра ҳисобни тенглаштириб қўйди. Бу эса ўйиннинг интригасини кескин ошириб юборди.
Баҳснинг 9-дақиқасида эса «кўк-анорранглилар» қарши ҳужумда ҳисобни тенглаштирди. Месси майдоннинг «Барселона» томонида тўпни эгаллади ва икки рақиб футболчисидан ўтиб, Суаресга пас берди. Луис ўз вақтида Неймарнинг очилаётганини кўрди ва уни тўп билан таъминлади. Бразилиялик ҳужумчи бирга бир вазиятга чиқиб борди ва осонлик билан дарвозани ишғол қилди — 1:1.
Шундан сўнг, устунлик тўлалигича «Атлетико» томонига ўтди. Улар кетма-кет ҳужум ташкил қилди. Ўйиннинг 29-дақиқасида ҳакам «Барселона» дарвозасига нотўғри пенальти белгилади. Маскерано Хуанфранга нисбатан ўйин қоидасини майдон ташқарисида бузганди. «Матрасчилар»нинг «штатдаги пенальтичиси» Рауль Гарсия кучли зарба билан жамоасини олдинга олиб чиқди.
Орадан кўп ўтмай, каталонияликлар «стандарт»дан ҳисобни тенглаштирди. Бурчакдан етказилган тўпга Бускетс бош билан зарба берди. Тўп олис устунга яқин жойда турган Мирандага тегиб, сўнгра устун орқали тўрга бориб тушди — 2:2.
Орадан 3 дақиқа ўтиб, «Барселона» учинчи голни урди, аммо бу ерда ҳам ҳакамнинг хатоси ҳал қилувчи аҳамиятга эга бўлди. Аслида «Барселона» дарвозасига пенальти белгиланиши керак эди. Ўнг қанотдан етказилган тўпни Торрес яқин масофадан дарвоза томон тепди. Тўп Албанинг тирсагига тегди. Аммо ҳакам ўйинни тўхтатмади ва каталонияликлар қарши ҳужумга ўтди. Тўп Мессига узатилди, Лионель тўп билан олдинга ҳаракат қилди ва чап қанотдан жарима майдончасига кирган Албага узатди. Хорди дарвозабон майдончасидаги Неймарга узатма берди ва бразилиялик футболчи осонлик билан дарвозани ишғол қилди — 2:3.
Ушбу ҳолат мезбонларни асло қониқтирмасди. Боз устига, ҳисоб 2:3 га етганидан кейин мадридликлар амалда ярим финал йўлланмасидан маҳрум бўлганди. Асабини жиловлай олмаган «Атлетико» сардори Габи танаффусда, кийиниш хонасида йўл олиш чоғида юзага келтирган тартибсизлик туфайли «қизил» олди.
Иккинчи бўлим ҳам қўполликларга тўла бўлди. Натижада ҳакам ўйин давомида 9 та сариқ карточка ва 2 та қизил карточкани кўрсатишга мажбур бўлди. «Атлетико» ўйинни 9 киши бўлиб якунлади. «Барселона» иккинчи бўлимда имкониятлардан фойдалана олмади.
Каталонияликлар Испания кубогининг ярим финалида «Вильярреал» — «Хетафе» жуфтлиги ғолиби билан баҳс олиб боради.
Испания кубоги, чорак финал, жавоб ўйини
«Атлетико» — «Барселона»: 2:3
Голлар: 1:0 — 1 Торрес, 1:1 — 9 Неймар, 2:1 — 30, пенальти Гарсия, 2:2 — 38, автогол Миранда, 2:3 — 41 Неймар.
Атлетико: Облак, Хуанфран (Гамес, 58), Миранда, Хименес, Сикейра, Суарес, Габи, Туран (Кани, 63), Гарсия, Гризманн (Сауль, 46), Торрес.
Барселона: тер Штеген, Дани Алвес, Бускетс, Пике, Альба, Иньеста, Маскерано (Матье, 62), Ракитич (Рафиня, 70), Неймар (Педро, 77), Месси, Суарес.
Огоҳлантиришлар: Гарсия (14), Маскерано (29), Габи (41), Месси (44), Туран (48), Суарес (69), Дани Алвес (74), Сикейра (75), Хименес (83), Кани (86).
Четлатишлар: Габи (45), Суарес (84).
Биринчи ўйин: 0:1
Изоҳ (0)