Самбо бўйича Ўзбекистон терма жамоаси аъзолари 2015 йилги спорт мавсумини муваффақиятли бошлади, деб хабар беради Ўзбекистон Миллий ахборот агентлиги.
Қозоғистонда самбо бўйича ўтказилган жаҳон кубоги босқичида Ўзбекистон терма жамоаси аъзолари еттита медални қўлга киритди.
20 дан зиёд давлатдан 200 нафардан ортиқ спортчи иштирок этган мусобақада жанговар самбо бўйича вазни 52 килограммгача бўлган полвонлар баҳсида Ўзбекистон вакили Раҳматжон Аҳмедов олтин медални қўлга киритди. Иқтидорли полвон спорт самбоси бўйича ўтказилган беллашувларда ҳам муваффақиятли қатнашиб, ўз вазн тоифасида учинчи ўринни эгаллади.
Жанговар самбо бўйича вазни 100 килограммдан ортиқ бўлган полвонлар баҳсида Исломжон Азимов кумуш медалга лойиқ топилган бўлса, 74 килограммгача оғирликда Фурқат Рўзиев бронза медаль билан тақдирланди.
Спорт самбоси бўйича вазни 90 килограммгача бўлган полвонлар ўртасида Ўзбекистон терма жамоаси аъзоси Илҳом Йўлдошев энг кучли эканини исботлади. У ҳал қилувчи баҳсда мезбонлар вакили Олмозбек Юсупов устидан ғалаба қозониб, олтин медалга сазовор бўлди.
Вазни 57 килограммгача бўлган самбочилар беллашувида Толмас Тўқлиев, 48 килограмм оғирликдаги хотин-қизлар баҳсида ўзбекистонлик спортчи Нодира Гулова бронза медаль билан тақдирланди.
Изоҳ (0)