Сервер Жепаров: «Ўйинни тактик ва жисмоний жиҳатдан бой бердик»
Хитой ҳамда Ўзбекистон миллий терма жамоалари ўртасидаги гуруҳ босқичи 2-тур учрашувидан кейин «Микс-зона»да терма жамоа футболчилари билан суҳбат бўлиб ўтди. Хусусан, терма жамоа ярим ҳимоячиси Сервер Жепаров бир қатор саволларга жавоб берди, деб хабар беради «Uff.uz».
Савол: Сервер, нима бўлди? Нега Хитойга қарши имконият бой берилди?
Жавоб: Ким билади, дейсиз. Биринчи бўлимни ёмон бошламагандик. Гол ҳам ургандик. Аммо иккинчи бўлимда барчаси ўзгариб кетди. Биз тактик жиҳатдан енгилдик. Жисмоний томонлама ҳам ўйинни бериб қўйдик. Хитой кучли ўйин кўрсатди.
Савол: Ҳали имкониятларимиз сақланиб турибди. Галдаги режалар нимадан иборат?
Жавоб: Энди Саудия Арабистонини ютмасак бўлмайди. Бошқа чорамиз ҳам йўқ. Ўйлайманки, шунда гуруҳдан чиқиш масаласи ҳал бўлади. Бу учрашувда бор кучимизни кўрсатамиз. Нима бўлган тақдирда ҳам ғалаба қозониш шарт!
Суҳбат давомида Сервер Жепаров буёғига Хитойга қарши ўйин таҳлил қилиниб, керакли хулосалар чиқарилиши, шунингдек, кейинги рақиб — Саудия Арабистонининг кучсиз жиҳатлари ўрганилишини қайд этди. Фикрини якунлар экан, ярим ҳимоячи учинчи ўйинда ғалаба қозониш учун қўлдан келган барчасини қилишини айтиб ўтди.
