Вашингтонда ўзбек кино санъати кечаси ўтказилди
АҚШ пойтахтидаги Жорж Вашингтон университетининг Л. Эллиотт номидаги Халқаро муносабатлар мактабида мазкур университетнинг Европа, Россия ва Евроосиё тадқиқотлари институти ҳузуридаги Марказий Осиё дастури билан ҳамкорликда ўзбек кино санъати кечаси ўтказилди, деб хабар бермоқда «Жаҳон» ахборот агентлиги.
Ушбу марказ тадқиқотчилари, аспирантлар, университет профессор-ўқитувчилари, америкалик эксперт ва таҳлилчилар ҳамда маданият арбоблари иштирок этган тадбир доирасида 1969 йилда Абдулла Қодирийнинг «Ўтган кунлар» романи асосида суратга олинган шу номдаги фильмнинг намойиши бўлиб ўтди.
Марказий Осиё дастури директори М. Лорел хоним Ўзбекистоннинг АҚШдаги элчихонасига мазкур тадбирни ташкиллаштиришдаги ҳамкорлиги учун миннатдорчилик билдириб, ушбу фильм ўзбек классик киносининг энг ажойиб намуналаридан бири эканлигини таъкидлади.
Тадбир якунида АҚШ томони келаси йилда Вашингтонда «Ўзбек киноси ҳафталиги»ни ўтказиш ва унга Ўзбекистон кинематографиясининг таниқли вакилларини таклиф қилишга қизиқиш билдирди.
