Қозоғистон АЁҚШларида 11 декабрдан бензин нархи арзонлашади
Қозоғистондаги автомобилларга ёнилғи қуйиш шохобчаларида 11 декабрдан бошлаб бензин нархи арзонлашади. Бу ҳақда Қозоғистон энергетика вазирлиги матбуот хизматига асосланган «Tengrinews.kz»га таяниб, «Кун» хабар бермоқда.
Қайд этилишича, 10 декабрь куни Қозоғистон энергетика вазири нархи давлат томонидан назорат қилинадиган нефть маҳсулотларини чакана сотиш нархларини белгилаш тўғрисида буйруқ чиқарган.
Ушбу буйруққа асосан, 11 декабрдан бошлаб Қозоғистон АЁҚШларида дизель ёнилғисининг бир литри 107 тенге (тахминан 815 сўм), Аи-80 русумидаги бензин 89 тенге (тахминан 680 сўм), Аи-92/93 бензини 115 тенге (тахминан 880 сўм)дан сотилади.
Экспертларнинг фикрича, Қозоғистондаги бензиннинг арзон нархлари узоқ вақт сақланиб қолмайди. 2015 йилдан бошлаб нархлар қимматлашув томон яна ўзгариши мумкин.
