2014 йилнинг январь октябрь ойлари давомида «Тошшаҳартрансхизмат» компанияси корхоналари ҳайдовчилари айби билан содир этилган йўл-транспорт ҳодисалари сони 2013 йилнинг шу даврига нисбатан сезиларли даражада ошди. Бу ҳақда «Пойтахт транспорти» газетасига «Kun.uz» хабар бермоқда.

Жумладан, ҳайдовчилар айби билан 67 та ЙТҲ содир этилиб, 2013 йилнинг шу даврига нисбатан 4 тага ошган. ЙТҲлар оқибатида 6 фуқаро вафот этиб, бу ўтган йилга нисбатан 1 нафарга кўп; жароҳатланганлар сони эса 81 нафар бўлиб, 2013 йилга нисбатан ушбу кўрсаткич 3 нафарга кўпайган.

Маълумотларга кўра, ҳайдовчилар айби билан содир этилган ЙТҲларнинг 26 таси ёки 39 фоизи пиёдани уриб юбориш билан боғлиқ оғир ҳодисага тўғри келмоқда. «Яъни, ҳайдовчилар охирги пайтларда пиёдаларга нисбатан эътиборсиз муносабатда бўлишмоқда, ўз навбатида, пиёдалар ҳам йўлнинг белгиланмаган жойидан кесиб ўтиб, ҳаракат хавфсизлигига раҳна солмоқдалар», – деди компаниянинг Йўловчи транспортида ҳаракат хавфсизлигини таъминлаш хизмати бошлиғи Муҳаммаджон Қаҳҳоров.

Қайд этилишича, автобуслар орасида энг кўп ЙТҲлар Mercedes-Benz Conecto Low Floor автобуслари ҳайдовчилари томонидан содир этилган (35 та ёки 52 фоиз). Isuzu ҳайдовчилари томонидан эса 21 та (ёки 31 фоиз) ЙТҲлар содир этилган. Трамвайлар орасида эса энг кўп ЙТҲ «Татра-3М» ҳайдовчилари томонидан (5 та) содир этилган, «КТМ-619» ҳайдовчилари томонидан эса 3 та ЙТҲ содир этилган.