Apple ва дастурий таъминот ишлаб чиқариш билан шуғулланувчи IBM компанияси корпоратив мижозлар учун мобил дастурлар ишлаб чиқаради. Бу ҳақда ITAR-TASS хабар берди.
Компаниялар раҳбарлари Кук ва Рометтининг сўзларига кўра, биргаликда чиқарилган маҳсулот биринчи бўлиб IBM’нинг корпоратив мижозларига таклиф қилинади. Янги дастурлар соддалиги билан фарқ қилади ва уни яратишда корпоратив мижозлар билан ишлайдиган IBM консултантларининг катта тажрибасидан фойдаланилади.
Янги маҳсулотлар катта ҳажмдаги маълумотларни анализ қилиш, маълумот ҳавфсизлиги ва турли хил қурилмаларни бошқаришда ишлатилиши режалаштирилган. IBM ходимлари эса техник ёрдамга жавобгар бўлади.
iOS операцион тизимида ишлайдиган бу дастурлар жорий йилнинг кузида тақдим этилади ва 2015 йилдан биргаликда ишлаб чиқилган дастурлар сони кўпаяди, деб ёзади The Verge нашри.