Тожикистон ҳукумати Қирғизистондан Баткен вилоятида жойлашган «Тамдик» чегара постини олиб ташлашни талаб қилди. Бу ҳақда Қирғизистон Чегара хизмати ИТАР-ТАССга маълум қилди.
Икки давлат чегара идоралари ўртасида бўлиб ўтган музокараларда тожик томони ана шундай талаб билан чиққан.
«Чегара пости олиб ташланмаса, 30 га яқин Тожикистон фуқаролари у ерга ҳужум қилиш учун тайёр турибди, ҳукумат эса уларнинг ҳаракатлари учун жавоб бермайди», — деди Чегара хизмати ходими.
Эслатиб ўтамиз, 10 июль куни Тожикистонлик чегарачилар Қирғизистоннинг «Тамдик» чегара постини миномёт ва гранатомётлар билан ўққа тутди.
Қирғизистон чегарачилари давлат чегарасидаги талаш ҳудудда водопровод қуришни тўхтатишни талаб қилгач, Тожикистон фуқаролари уларга тош ёғдира бошлаган. Натижада воқеа жойига етиб келган ҳар иккала давлат чегарачилари ўртасида отишма бошланган.
Изоҳ (0)