Миржалол Қосимов: «Мухлислар кутган ўйинни намойиш қила олмадик»
Ўзбекистон—Уммон ўртасидаги иккинчи ўртоқлик ўйинидан сўнг ўтказилган матбуот анжуманида Ўзбекистон миллий терма жамоаси бош мураббийи Миржалол Қосимов иштирок этиб, ўйин ҳақида ўз фикрларини билдирди, деб ёзади Uff.uz.
«Мухлисларга байрам улашмоқчи эдик. Аммо мағлубиятга учрадик. Мухлислар кутган ўйинни намойиш қила олмадик. Албатта, бу натижадан қониқиш ҳосил қилмадим», — дейди мураббий.
Биринчи бўлимда яхши ўйин кўрсата олмадик. Футболчилар бир-бирларини яхши тушунмади. Иккинчи таймда майдонга ёшларни туширдик. Улар ўйинни бироз кучайтира олди. Битта нарсани айтиб ўтиш керак.
Ҳозир Осиёдаги барча жамоалар кучаймоқда. Аввалгидек кучсиз терма жамоаларнинг ўзи йўқ. Албатта, ҳали Осиё чемпионатигача етарлича вақт бор. Унгача мана шундай ўйинларда ёш футболчиларни синаб, улар нималарга қодир эканликларини кўриб оламиз.
Аввал хабар берилганидек, Уммонга қарши иккинчи ўйин Шацких, Бақоев ва Карпенко учун хайрлашув ўйини бўлди. Анжуманда хайрлашув учрашувини ташкил қилиш фикри кимдан чиққани ҳақидаги саволга Миржалол Қосимов шундай жавоб берган: «Бугун уч нафар футболчимиз терма жамоа билан хайрлашди. Бу таклифни биз уларга билдирган эдик. Футболчиларнинг ўзи ҳам буни хоҳлашди. Улар ўз вақтида терма жамоага кўп ёрдам берган. Кўп меҳнатлари сингган. Мағлубиятга учраган бўлсак ҳам, кетаётган ўйинчиларга ўзига хос ўйин, ўзига хос кичкина байрам ташкил қилиб бердик, деб ўйлайман».
Журналистлар ўйинга Сервер Жепаров, Тимур Кападзе, Александр Гейнрих, Азиз Ҳайдаров каби терма жамоа етакчилари чақирилмаганининг сабабини сўраганда мураббий: «Асосий мақсад ёшларни синовдан ўтказиш эди. Бу футболчилар ҳали терма жамоа учун кўп ёрдам беради, деб ўйлайман. Улар терма жамоадаги фаолиятларини давом эттиради», — дея жавоб қайтарган.
Эслатиб ўтамиз, Ўзбекистон—Уммон ўртасидаги «Жар» стадионида ўтказилган иккинчи учрашувда ҳам 1:0 ҳисобида меҳмонлар ғалаба қозонди.
