Apple АҚШда Samsung смартфонлари сотуви тақиқланишига эришмоқчи

Apple компанияси Samsungга қарши янги даъво очиб, унинг тўққизта қурилмаси АҚШда сотилиши тақиқланишини талаб қилмоқда. Бу ҳақда Mail.ru хабар берди.

Ҳуқуқшуносларнинг таъкидлашича, Apple’нинг бундай тақиққа эришиши қийин бўлади. Гап шундаки янги иш судья Люси Кох томонидан кўриб чиқилади, у Apple’нинг 2012 йилдаги шунга ўхшаш мурожаатини икки марта қайтарган эди. Агарда, Apple бундай тақиққа эришса ҳам, бу Samsung’га қимматга тушмайди, чунки «стоп-лист»га анчагина эски қурилмалар киритилган (Galaxy S4 ва Galaxy S5 флагманлари у ерда йўқ).

Нашрнинг қайд этишича, Samsung ҳам Apple смартфонлари сотувининг ман қилиниши ҳақида сўров бериши мумкин, охирги ишда у ўз патентларидан биттаси бузилганини исботлаган эди.

2 май куни АҚШ Федерал маслаҳатчилар суди Apple ва Samsung компанияларининг бир-бирига қарши патент даъволари бўйича қарор чиқарди. Унга кўра, иккита патентни кўчирган Samsung 119,6 миллион доллар, ўз рақибининг битта патентини ўғирлаган Apple эса 158,4 минг доллар тўлайди.