Бразилиянинг йирик шаҳарларида футбол бўйича жаҳон чемпионатига қарши иш ташлашлар бўлиб ўтди

Бразилиянинг Сан-Паулу ва Рио-де-Жанейро шаҳарларида футбол бўйича жаҳон чемпионатини ўтказишга қарши иш ташлаш ва норозилик намойишлари ўтказилди. Бу ҳақда «ИТАР-ТАСС» хабар берди.

Сан-Паулуда кетма-кет икки кун автобус ҳайдовчилари ва кондукторлар иш ташлади. Натижада миллионлаб одамлар ишга ва уйга вақтида етиб бора олмади, метро бекатларида эса оломон тўпланиб қолди.

Рио-де-Жанейро ва Бразилиянинг яна олти штатида кун бўйи фуқаро полицияси ходимлари иш ташлаш намойишларини ўтказди. Улар иш ҳақини ошириш ва хизмат шароитларини яхшилашни талаб қилди.

21 май куни кечқурун Рио-де-Жанейрода Бразилияда 12 июнь – 13 июль кунлари бўлиб ўтадиган жаҳон чемпионатига тайёргарлик учун давлат бюджети маблағлари ажратилишига қарши бўлган оломон тўпланди. 600 га яқин намойишчилар ҳукуматдан соғлиқни сақлаш ва таълим тизимини молиялаштириш ҳажмини оширишни талаб қилди.

Тунга яқин вазият яхши томонга ўзгарди: ҳайдовчилар ўз ишларига қайтди, полиция эса ЖЧ ўтказиладиган даврда иш ташламаслиги маълум қилди.

Ҳукумат турнир давомида оммавий норозилик ҳаракатлари бўлишини кутмоқда, музокаралар йўли билан уларнинг олдини олиш чораларини кўрмоқда.