Болқондаги энг кучли дея таърифланаётган сув тошқини натижасида камида 44 киши ҳалок бўлди. Бу ҳақда ҳодисадан зарар кўрган мамлакатлар ҳукуматлари маълумотларига таяниб, Interfax хабар берди.
Уларнинг 27 нафари Босния ва Герцеговинада, 16 нафари Сербияда ва бир киши Хорватияда қурбон бўлган.
Минтақада 120 йиллик метеокузатувлар давомида энг кучли деб топилган тошқин сел келиши натижасида содир бўлди. Синоптиклар баҳолашича, уч кун ичида минтақада ёғингарчиликнинг уч ойлик меъёри ёғган.
Сава дарёси тошиб кетгач, Босния шарқидаги Биелин шаҳридан 10 мингдан ортиқ киши эвакуация қилинган. Баъзи аҳоли пунктларида сув уйларнинг иккинчи қаватигача кўтарилган. У ерда истиқомат қилувчилар вертолёт ёрдамида қутқарилган.
Ёмғир авжи ўтган бўлса-да, тошқин билан боғлиқ вазият ёмонлашиши эҳтимоли бор. Белградда Сава дарёси ўзанидан чиқиб кетиши мумкин. Сув сатҳининг кўтарилиши натижасида Сава қирғоқларидаги йирик электр станцияларига зиён етиши мумкин.
Зарар кўрган ҳудудларда Европа ва Россия қутқарувчилари ишламоқда.