Солиқ қўмитасининг уч нафар раҳбар ходими ишдан четлатилди

Ўзбекистон Республикаси Давлат солиқ қўмитасида Қорақалпоғистон Республикаси, вилоятлар ва Тошкент шаҳар давлат солиқ хизмати органлари раҳбарлари иштирокида Ҳайъатнинг кенгайтирилган селектор йиғилиши бўлиб ўтди. Бу ҳақда Давлат солиқ қўмитаси ахборот хизмати хабар берди.

Муҳокамада марказий аппарат таркибий тузилмалари ва ҳудудий давлат солиқ хизмати органлари раҳбарларининг ҳисоботлари эшитилиб, фаолиятида камчиликларга йўл қўйган уч нафар раҳбар ходим эгаллаб турган лавозимидан озод этилди, 23 нафарига нисбатан тегишли интизомий жазо чоралари қўлланилди.

Йиғилишда 2014 йил 5 май куни қабул қилинган Ўзбекистон Республикасининг «Давлат ҳокимияти ва бошқаруви органлари фаолиятининг очиқлиги тўғрисида»ги Қонуни асосида давлат солиқ хизмати органларида амалга оширилиши лозим бўлган вазифалар белгилаб олинди.

Ўзбекистон Республикаси Президенти девонининг 2014 йил 5 майдаги 04/1-476-сонли хатида қайд этилган нақд пул тушумларининг тўлиқ банк кассаларига топширилишини таъминлаш, нақд пул маблағларининг банкдан ташқари ноқонуний айланишини қисқартириш борасидаги камчиликларни бартараф этиш, шунингдек, белгиланган топшириқлар ижросини ташкил қилиш борасидаги муҳим вазифалар муҳокама қилиниб, ҳудудий давлат солиқ хизмати органлари раҳбарларига аниқ топшириқлар берилди.

Вазирлар Маҳкамасининг 2004 йил 1 ноябрдаги «Электр энергиясидан фойдаланганлик учун ҳисоб-китоб қилиш механизмини тубдан такомиллаштириш чора-тадбирлари тўғрисида»ги 511-сонли қарори ижросини таъминлаш борасида Қорақалпоғистон Республикаси, Сурхондарё ва Хоразм вилоятларида мутасадди идоралар билан ҳамкорликдаги ишлар танқидий муҳокама қилинди.

Юридик ва жисмоний шахслар томонидан валюта ва экспорт-импорт операцияларини амалга оширишда қонун ҳужжатларига қатъий риоя этилиши юзасидан олиб борилаётган назорат ишларининг натижадорлиги Бухоро, Қашқадарё ва Фарғона вилоятлари мисолида кўриб чиқилиб, келгусида амалга оширилиши лозим бўлган чора-тадбирлар белгиланди.

Ҳайъат йиғилишида солиқ тўловларининг тўлиқ ва ўз вақтида тўланиши борасида аниқланган ҳуқуқбузарлик ҳолатлари, уларнинг олдини олиш юзасидан ташкил этилаётган тарғибот-ташвиқот ишлари натижалари таҳлил қилинди, бу борада бажарилиши лозим бўлган вазифалар белгилаб олинди.