«Ўзэкспомарказ»да «Ўзбекистон нефт ва гази – OGU—2014» 18-халқаро кўргазмаси ва Энергетика – Power Uzbekistan—2014 9-халқаро ихтисослаштирилган кўргазмаси очилди, деб хабар беради ЎзА.
Кўргазмалар «Ўзбекнефтгаз» миллий холдинг компанияси, Ўзбекистон Республикаси Ташқи иқтисодий алоқалар, инвестициялар ва савдо вазирлиги, «Ўзбекэнерго» давлат акциядорлик компанияси, Савдо-саноат палатаси, ITЕ Узбекистан халқаро кўргазмалар компанияси томонидан ITЕ компаниялари гуруҳи билан ҳамкорликда ташкил этилди.
Экспозицияда Хитой, Жанубий Корея, АҚШ, Франция, Буюк Британия, Германия, Венгрия, Вьетнам, Польша, Италия, Россия, Руминия, Дания, Қозоғистон, Туркия каби 20 давлатдан 160 дан ортиқ компания ўз маҳсулотларини намойиш этмоқда.
«OGU—2014» кўргазмасида «Ўзнефтмаҳсулот», «Ўзнефтгазқурилишинвест», «Ўзнефтгазмаш» акциядорлик компаниялари, Муборак газни қайта ишлаш заводи, «Шўртан газ-кимё комплекси» унитар шўба корхонаси ва бошқа компаниялар углеводородларни қидириш, қазиб олиш, бурғулаш, тоғ-кон саноати, иситиш, пайвандлаш жиҳозлари, автомобилларга газ тўлдириш компрессор станциялари ва ёқилғи қуйиш шохобчалари учун қурилмалар, синтетик суюқ ёқилғи ишлаб чиқариш бўйича энг яхши таклифлар тақдим этган.
Хитой ва Жанубий Корея компаниялари ҳам кенгайтирилган таркибда қатнашмоқда. Жумладан, Жанубий Кореянинг Kwang Shin компанияси ҳаво ва газ компрессорлари, автомобилларга газ тўлдириш компрессор станциялари асбоб-ускуналарини тақдим этмоқда. Хитойнинг Shanghai SK Petroleum Equipment Co. Ltd компанияси кенг турдаги бурғулаш қурилмалари, жумладан, бошқарув пультлари, геологик анализаторлар, қудуқ ва сурма қопқоқларни назорат қилиш ускуналарини намойиш этаётир.
– Компаниямиз ўзбекистонлик шериклар билан 2008 йилдан буён ҳамкорлик қилиб келмоқда, – дейди Shangdong Kerui Petroleum Equipment Co. Ltd компаниясининг мамлакатимиздаги ваколатхонаси бош директори Дэвид Ву (Хитой). – Ўзбекистонда нефт-газ тармоғининг жадал суръатлар билан ривожланиб бораётгани ўзаро манфаатли ҳамкорлик учун янги имкониятлар очмоқда. «OGU—2014» кўргазмасида Ўзбекистон компаниялари билан ҳамкорлик алоқаларини кенгайтириш ниятидамиз.
Германиянинг Draegerwek AG, Jumo Gmbh&Co. KG, Kanex Kronhe Anlagen Export Gmbh ва бошқа йирик компанияларининг экспозициялари ҳам кўпчиликнинг эътиборини тортмоқда. Улар ишлаб чиқариш хавфсизлиги ва муҳофазасини таъминлаш, контроллерлар, ростлагич ва индикаторлар, ўлчов техникалари, дизел двигательлари ва турбиналар ишлаб чиқариш бўйича ўз ишланмаларини намойиш этмоқда.
Италия, Франция, Руминия, Польша ва Даниядан ташриф буюрган иштирокчилар стендларида транспорт-експедиторлик хизматлари, бошқарув тизимлари, нефт-газ тармоғи учун технологик қурилмалар ва бошқа ускуналар тақдимотлари ўтказилмоқда.
Масалан, Италиянинг SAFE s.p.a компанияси кенг турдаги газ компрессори жиҳозлари, Руминиянинг Sonfind компанияси нефт саноати учун кенг турдаги ускуналар намойиш этмоқда.
Кўргазма доирасида халқаро илмий-техникавий конференция ҳам ўтказилади. Унда Ўзбекистон нефт-газ саноатини ривожлантириш масалалари, муваффақиятли тажриба ва халқаро ҳамкорликнинг янги имкониятлари, мамлакат нефт-газ саноатидаги лойиҳаларни молиялаштириш ва бошқа долзарб мавзулар муҳокама этилади.
«Ўзбекистон нефт ва гази – OGU—2014» халқаро кўргазмаси билан бир майдонда энергетика, энергияни тежаш, муқобил энергия манбалари соҳасидаги энг сўнгги ютуқлар намойиш этилаётган Энергетика – Power Uzbekistan—2014 халқаро кўргазмаси ҳам бўлиб ўтмоқда.
Кўргазмада Хитой, Жанубий Корея, Германия, Франция, Россия, Туркия ва Қозоғистондан 50 га яқин компания иштирок этаётир.
Хитойлик ишлаб чиқарувчиларнинг кенг турдаги маҳсулотлари иштирокчилар ва меҳмонлар эътиборини ўзига жалб этмоқда. Chengdu Andisoon Measure Co. Ltd, Jiangsu Tongguang Optical Cable Co. Ltd, Sanbian Sci-Tech Co. Ltd бошқа компаниялар трансформатор, генератор, электродвигатель ва бошқа кўплаб маҳсулотларни намойиш этмоқда. Корея Республикаси, Туркия ва Франциядан ташриф буюрган ишлаб чиқарувчилар энергетика соҳасидаги энг замонавий ишланмаларни тақдим этмоқда.
Халқаро кўргазма доирасида «Энергетика—2014: инновациялар, ечимлар, истиқболлар» мавзусида семинарлар ўтказилади. Уларда энергиядан фойдаланиш усулларини такомиллаштириш, мавжуд станцияларни модернизация қилиш ва бошқа долзарб масалалар бўйича тақдимотлар бўлиб ўтади.
Изоҳ (0)