АҚШ ва Евроиттифоқнинг йирик компаниялари раҳбарлари Санкт-Петербургдаги иқтисодий форумда қатнашишдан бош тортди. Бу ҳақда Reuters хабар берди.
Ҳар йили ўтказиладиган халқаро тадбирда иштирок этмоқчи бўлганлар рўйхатига март ойида қўшилган 11 нафар бизнесменлар исм-шарифлари форум сайтидан ўчирилди.
Форумга ташриф буюриш режасидан воз кечганлар қаторида ConocoPhillips, Airbus Group, Visa Inc, Alcoa, Siemens, Citigroup, Morgan Stanley, International Paper Company, Pepsi, Италиянинг Eni компанияси топ-менежерлари ҳамда Bain & Company консалтинг гуруҳи раҳбари бор.
Ўндан ортиқ бошқа тадбиркорлар форум дастурида қолган, бироқ уларга яқин манбаларнинг айтишича, бошқа раҳбарлар ҳам ташрифни бекор қилиши мумкин.
Аввалроқ Оқ уй матбуот котиби Жей Карни АҚШ ҳукумати бизнес етакчилари билан Россиядаги иқтисодий форумни муҳокама қилиб, «Украина суверенитети ва ҳудудий яхлитлигининг қўпол бузилиши» туфайли уларнинг ушбу тадбирдаги иштироки ўринсиз бўлишини таъкидлаганини маълум қилган эди.
Компанияларнинг деярли барчаси форумга келмаслик сабабини турли баҳоналар билан боғлади. Биргина Alcoa раҳбари Клаус Клайнфелд «АҚШ ҳукумати талаби билан» тадбирда иштирок этмаслигини очиқ-ойдин эътироф этди.
Изоҳ (0)