«Камолот» ёшлар ижтимоий ҳаракати марказий кенгаши томонидан қатор вазирлик ва ташкилотлар ҳамкорлигида Тошкент вилоятининг Бўстонлиқ туманидаги «Камолот» ёшлар оромгоҳида «Кино ва ёшлар» республика форуми ташкил этилди, деб хабар берди ЎзА.
Унда «Ўзбеккино» миллий агентлиги қошидаги бадиий кенгаш аъзолари, маданият ва санъат арбоблари,кинорежиссёрлар, актёрлар, драматурглар, киношунос олимлар, «Камолот» ёшлар ижтимоий ҳаракати бошланғич ташкилотлари фаоллари, талаба-ёшлар иштирок этди.
Форум доирасида мавзуга доир қизиқарли савол-жавоблар, баҳс-мунозаралар бўлди. Адабий сценарий – кино санъати асоси, кинодебют – дастлабки қадам, қисқа метражли кино, замонавий болалар киноси каби қатор долзарб мавзуларда мутахассислар ва ёшлар ўзбек миллий кинематографиясининг бугунги ҳолати ва истиқболлари хусусида фикр алмашди.
Драматургия ва режиссурани ривожлантириш, кадрларнинг билим ва малакасини ошириш, уларнинг тажриба алмашишига имкон яратиш, ёш ижодкорлар учун маҳорат сабоқлари ташкил этиш, таълимда «Устоз-шогирд» анъанасини йўлга қўйиш, зарур дарслик, ўқув қўлланмалари ҳамда методик материаллар яратиш масалалари ўртага ташланди.
– Болаларни мушоҳада юритишга чорлайдиган, онги ва тафаккурини бойитадиган, қалбида ватанпарварлик, эзгулик, меҳр-муҳаббат туйғуларини қарор топтирадиган асарлар кўпроқ яратилишини давр талаб қилмоқда,– дейди Ўзбекистон давлат санъат ва маданият институти талабаси Сирожиддин Рустамов.
Форум давомида кейинги йилларда яратилган бир қатор бадиий ва хужжатли фильмлар намойиш этилди. Ушбу фильмлар ижодкорлари билан суҳбатларда ёшлар ўзларини қизиқтирган саволларга жавоб олди. Кино санъатининг сеҳрли олами, фильм яратилиши учун асос бўлган ғоянинг санъат асарига айланишигача бўлган жараён ҳақида билимини бойитди.
Изоҳ (0)