2014 йилнинг 5 май куни баҳорги Умра сафарига борган 171 нафар зиёратчидан иборат сўнгги гуруҳ Ўзбекистонга қайтиб келди. Бу ҳақда Ўзбекистон Республикаси Вазирлар Маҳкамаси ҳузуридаги Дин ишлари бўйича қўмитанинг расмий сайти хабар берди.
Баҳорги умра зиёратини 5 900 дан зиёд ўзбекистонлик (Тошкент–Жидда–Тошкент йўналиши бўйича 31 та рейсда) адо этди.
15 февраль кунидан 5 май кунига қадар ўзбекистонлик зиёратчиларнинг Саудия Арабистони Подшоҳлигига умра сафарлари ташкил этилди.Кузатиш ва кутиб олиш тадбирлари Дин ишлари бўйича қўмита, Ўзбекистон мусулмонлари идораси ҳамда тегишли мутасадди вазирлик ва идоралар ҳамкорлигида амалга оширилди.
Саудия Арабистонида ҳаво ҳароратининг юқори даражада бўлишини инобатга олиб, шифокорлар гуруҳи томонидан зиёратчиларнинг саломатлигини сақлаш мақсадида эслатма-тавсиялар ишлаб чиқилиб, тегишли тушунтириш ишлари олиб борилди.
Зиёрат 10 кунни (Мадинада 3 кун, Маккада 6 кун, Жиддада 1 кун) ташкил этди. Зиёратчиларга мавсум давомида ўзбекистонлик саккиз нафар ишчи гуруҳи, 28 нафар шифокор ва тўрт нафар ошпаз хизмат кўрсатди. Зиёратчиларимизнинг 3 маҳал овқатланишлари учун қулайликлар яратиш мақсадида меҳмонхоналарда ошхоналар ташкил этилди. Меҳмонхонада кичик шифохона фаолият кўрсатди.
Ишчи гуруҳи томонидан зиёратчиларни Ҳарамга олиб бориш учун автобус ҳаракати, адашганларни топиш учун махсус қидирув гуруҳи, шунингдек, меҳмонхоналарда узлуксиз навбатчилик ташкил этилди.
Ўзбекистонлик зиёратчилар Мадина шаҳрида Масжиди Набавий билан ёнма-ён жойлашган «Мавадда Нур» меҳмонхонаси ҳамда Макка шаҳрида Ҳарамдан 900 метр узоқликдаги «Нама Мавадда» меҳмонхоналарида истиқомат қилди.
Зиёратчилар учун Саудиядаги меҳмонхоналарда сунъий йўлдош орқали Ўзбекистон телевидениеси дастурларини томоша қилиш, Ватанимизда бўлаётган воқеалардан хабардор бўлиш имконияти яратилди.
Эслатиб ўтамиз, баҳорги Умра мавсуми Ўзбекистон Республикаси Президенти Фармонига мувофиқ тузилган «Ҳаж» ва «Умра» тадбирларини ташкил этиш ва ўтказиш масалалари бўйича Жамоатчилик кенгашининг қарорлари ва тавсиялари асосида амалга оширилди.
Жорий йилнинг 7 июлидан 29 июль кунига қадар «Умра—2014» Рамазон ойи мавсуми ташкил этилади. Унда 663 нафар ўзбекистонлик зиёратчининг сафарларини ташкил этиш режалаштирилмоқда.
Изоҳ (0)