Термиз шаҳрида «Юксак маънавиятли авлод» фестивалининг Сурхондарё вилояти босқичи бўлиб ўтди, деб хабар берди ЎзА.

Тадбир Республика Маънавият тарғибот маркази, Олий ва ўрта махсус, Халқ таълими вазирликлари, Ўзбекистон Бадиий академияси ва «Камолот» ёшлар ижтимоий ҳаракати марказий кенгаши ҳамкорлигида ташкил этилди.

– Илк бор ўтказилаётган фестивалнинг шаҳар ва туман босқичларида тўрт ярим мингдан ортиқ ёш қатнашди, – дейди Республика Маънавият тарғибот маркази вилоят бўлими раҳбари Муҳаммад Азимов. – Вилоят босқичида уч юзга яқин ёш ўз билим ва интеллектуал салоҳиятини синовдан ўтказди.

Жорий йилдан бошлаб «Умид ниҳоллари», «Баркамол авлод» ва Универсиада спорт мусобақалари олдидан ўтказилиши йўлга қўйилган мазкур фестивалда 14 ёшдан 25 ёшгача бўлган иқтидорли йигит-қизлар «Президент асарлари билимдони», «Энг янги тарих билимдони», «Ўз асарида миллийликни акс эттирган рассом», «Ўз асарида миллийликни акс эттирган дизайнер», «Ватан куйчиси», «Энг иқтидорли ҳунарманд», «Бадиий ижод» номинациялари бўйича баҳслашди.

– Ёғоч чиқиндиларига қайта ишлов бериш орқали болажонлар учун стулча ва бошқа уй-рўзғор буюмлари ясашга қизиқаман, – дейди Шўрчи туманидаги 9-умумтаълим мактабининг 7-синф ўқувчиси Дилшод Каримов. – Дарсдан бўш вақтларимда мактабимиздаги ҳунармандчилик тўгарагида соҳа сирларини янада чуқурроқ ўрганмоқдаман.

Ғолиблар фестивал ташкилотчиларининг махсус диплом ва эсдалик совғалари билан тақдирланди. Улар энди фестивалнинг мамлакат босқичида иштирок этади.