«ВКонтакте» ижтимоий тармоғи асосчиси Павел Дуров Сент-Китс ва Невис федерацияси фуқаролигини олиш учун 250 минг доллар тўлади, дея хабар берди gazeta.ru.
Ушбу орол-давлат қонунчилигига кўра, 250 минг доллар миқдоридаги ҳадя автоматик тарзда фуқароликни қўлга киритиш ҳуқуқини беради. Таъкидланишича, Дуров февраль ойидаёқ Сент-Китс ва Невис Шакар фондига фуқаролик учун зарур суммани ўтказган. «Шакар саноатини диверсификациялаш фонди ‘Инвестициялар орқали фуқаролик’ дастурини амалга оширишга ихтисослашган ташкилотдир», — дейилади хабарда.
Айни пайтда Дуров БААга жўнаб кетган. У доимий яшаш жойи ҳақида аниқ бир қарорга келганича йўқ. «ВКонтакте» асосчиси БААда ҳам резидентлик визасига эга. Бундай виза билан мамлакатда уч йилгача яшаш, кейин уни яна узайтириш мумкин.
Эслатиб ўтамиз, Дуров ўзининг «ВКонтакте» бош директорлиги лавозимидан кетиши ҳақида 1 апрель куни хабар берган, кейинроқ эса ушбу хабар ҳазил бўлганини таъкидлаган эди. Шунга қарамасдан, у 21 апрель куни ишдан бўшатилди. Дуров ўзининг ишдан кетганлиги ҳақидаги хабарни матбуотдан билиб олганини айтган. Шундан сўнг у мамлакатни тарк этгани ва ортга қайтмаслигини маълум қилган.
Сент-Китс ва Невис федерацияси — Кариб денгизининг шарқий қисмидаги Кичик Антил ороллари архипелагида жойлашган давлат. Майдони 261 км². Аҳолиси 51,134 минг киши.
Изоҳ (0)