Ўзбекистон Бадиий академияси Марказий кўргазмалар залида тасвирий санъат фестивали бошланди. Шу муносабат билан ташкил этилган тантанали тадбирда турли вазирлик ва идоралар, ижодий ва жамоат ташкилотлари, мамлакатимизда фаолият кўрсатаётган хорижий дипломатик корпус вакиллари, ўқитувчилар, маънавият тарғиботчилари, талаба-ёшлар иштирок этди, деб ёзади ЎзА.
Бу йил 11 марта ўтказилаётган, Соғлом бола йилига бағишланган фестивалда – ёш мусаввирлар, ҳайкалтарош ва ҳунармандлар томонидан яратилган энг сара асарлар меҳрибонлик уйлари, махсус мактаб-интернатларга тақдим этилади. Ушбу таълим-тарбия масканларининг тарбияланувчилари, ўқувчилари ҳам фестивал тадбирларига таклиф қилинди. Мазкур лойиҳа доирасидаги тадбирлар давомида алоҳида эҳтиёжли болалар учун рассомлар иштирокида маҳорат сабоқлари ўтказилиши кўзда тутилган.
Тасвирий санъатнинг ўзига хос марафони бўлган ушбу ижодий ҳафталик қизиқарли ва бетакрор бадиий дастурлар, концертлар, давра суҳбатлари, учрашувларга бойлиги билан аҳамиятлидир. Фестивал доирасида миллий либослар, санъат ва маданиятимизга бағишланган фильмлар намойиш этилади.
Санъат ҳафталигида Қорақалпоғистон Республикаси ва вилоятларда фаолият кўрсатаётган рассомлар ижоди ҳамда Бадиий академия тизимидаги олий ва ўрта махсус ўқув юртлари талабалари фаолиятига алоҳида эътибор қаратилади. Самарқандлик кулол Шариф Азимовнинг шахсий кўргазмаси ўтказилади. Фестивал доирасида япониялик ва озарбайжонлик ижодкорлар асарларидан иборат кўргазмаларнинг ташкил этилиши ижодий лойиҳанинг кўлами кенглигидан дарак беради.
«Замонавий тасвирий санъат: анъана ва янгилик» мавзусидаги анжуманда ўзбек тасвирий санъатининг ривожланиш тамойиллари, ёш ижодкорлар фаолияти, улар изланаётган жанрлар муҳокама этилади. Ўзбекистон халқ шоири Муҳаммад Юсуф таваллудига бағишлаб ташкил этилган кўргазма санъат ва шеърият ихлосмандлари учун ўзига хос туҳфа бўлади.
— Ўзбекистоннинг сўлим табиатини, Тошкентнинг бетакрор гўзаллигини кўришни кўпдан буён орзу қилардим, — дейди озарбайжонлик ҳайкалтарош Ҳусайн Аҳвердиев. — Бу табаррук замин Амир Темур, Беруний, Ибн Сино, Мирзо Улуғбек, Заҳириддин Бобур каби жаҳон цивилизацияси ривожига улкан ҳисса қўшган кўплаб алломаларга бешик бўлган диёрдир. Ўзбек заминининг бетакрор санъати ва маданияти ҳар қандай ижодкорга илҳом бағишлайди. Юртингизда санъатга, санъат аҳлига кўрсатилаётган ғамхўрлик ва эътиборнинг амалий ифодасини ушбу фестивалнинг юксак савияда, кўтаринки руҳда ўтказилиши мисолида яққол кўриш мумкин.
– Фестивалда ўтган йили ҳам иштирок этганман, – дейди Республика рассомлик коллежининг 2-курс ўқувчиси Акбар Ёқубжонов. – У ижодий ишларимизни таниқли рассомлар назаридан ўтказиш, устозларнинг маслаҳатларидан баҳраманд бўлиш имконияти яратилгани билан ҳам аҳамиятлидир.
Тасвирий санъат фестивали юртимизнинг турли ҳудудларида яшаб, ижод қилаётган мусаввирлар, халқ амалий санъати усталарининг ижод намуналаридан иборат катта кўргазма билан бошланди.
Изоҳ (0)