АҚШ давлат котибининг Европа ва Евроосиё масалалари бўйича ёрдамчиси Виктория Нуланд Америка 1991 йилдан бери Украинага 5 миллиард доллар миқдорида пул киритганини тан олди.
«Бу пуллар украин халқининг, унинг манфаатларини ҳимоя қиладиган демократик ҳукуматга эга бўлиш борасидаги орзу-умидларини қўллаб-қувватлашга сарфланган», – дея Нуланддан иқтибос келтирмоқда CNN.
Айни вақтда, Давлат департаменти вакиласининг сўзларига кўра, АҚШ «Майданни қўллаб-қувватлаш учун пул сарфламаган». «Бу Россия Украина шарқида амалга ошираётган ишлардан анча узоқда бўлган, халқнинг оммавий ҳаракати эди», – дейди Нуланд.
Эслатиб ўтамиз, АҚШ Украинадаги ижтимоий-сиёсий жараёнларга фаол аралашаётгани ва Евромайданни молиялаштираётгани ҳақидаги баёнотлар бундан аввал ҳам берилган эди. Хусусан, Украина хавфсизлик хизматининг собиқ раҳбари Александр Якименко қишнинг икки ойи давомида Ғарб Киевга миллионлаб доллар жўнатгани ҳақида айтган эди, деб ёзади «Кун».
Нуланднинг сўзларига кўра, Украинанинг ҳозирги ҳукумати ўз олдида турган икки вазифани аъло даражада амалга оширмоқда. Улардан биринчиси – Халқаро валюта жамғармаси билан муносабатлар ўрнатиш ва коррупцияга қарши ислоҳотларни бошлаш, иккинчиси эса – «эркин ва адолатли президент сайловларини ўтказиш»дан иборат.
Давлат котибининг қайд этишича, Украина шарқида давом этаётган ҳодисалар муносабати билан Украина ҳукумати сайловларнинг тинч ўтишини таъминлаш бўйича тегишли чораларни кўриши керак.
Изоҳ (0)