2014 йили Бухорода 18 мингдан ортиқ янги иш ўрни яратилди

Бухоро шаҳрида одам савдосига қарши курашиш бўйича идоралараро вилоят комиссиясининг йиғилиши бўлиб ўтди. Унда Ўзбекистон Республикасининг «Одам савдосига қарши курашиш тўғрисида»ги қонуни ижроси доирасида вилоят комиссияси томонидан олиб борилаётган ишлар таҳлил қилинди. Бу ҳақда ЎзА хабар беради.

Одам савдоси билан боғлиқ жиноятларнинг олдини олиш учун аҳоли бандлигини таъминлаш борасида Бухоро вилоятида қатор чора-тадбирлар амалга оширилмоқда. 2014 йилнинг ўтган даврида вилоятда янги ишлаб чиқариш объектларини фойдаланишга топшириш, мавжуд корхоналар қувватини ошириш натижасида 18 415 янги иш ўрни яратилди. Туман ва шаҳар бандликка кўмаклашиш ва аҳолини ижтимоий муҳофаза қилиш марказлари томонидан 4169 нафар, меҳнат ярмаркалари орқали 2787 нафар фуқарога ишга жойлашиш учун йўлланма берилди. Иш билан таъминланганларнинг аксарияти ёшлар ва хотин-қизлардир.

Ноқонуний меҳнат миграцияси ва одам савдоси жиноятларининг олдини олишда маҳаллаларда, таълим муассасаларида тарғибот ишлари кучайтирилмоқда. Ушбу жиноятнинг салбий оқибатлари тўғрисида аҳолини кенг хабардор қилиш мақсадида давра суҳбатлари, семинарлар, оммавий тадбирлар ўтказилмоқда.

Йиғилишда одам савдосидан жабр кўрганларга тиббий, ижтимоий-руҳий ёрдам кўрсатишга ҳам алоҳида эътибор қаратилаётгани қайд этилди. Ноқонуний меҳнат миграциясининг олдини олиш борасидаги камчиликлар атрофлича муҳокама этилди. Одам савдосига қарши курашиш бўйича Ромитан ва Пешку туманлари ҳудудий комиссиялари фаолиятини ўрганиш натижалари кўриб чиқилди.