Навоий шаҳрида «Истиқлол ғунчалари» анъанавий болалар ижодиёти фестивали бўлиб ўтди. Бу ҳақда ЎзА хабар берди.
Ўзбекистон Республикаси Вазирлар Маҳкамасининг 2011 йил 28 февралдаги «Мактабдан ташқари таълим тизимини янада такомиллаштириш чора-тадбирлари тўғрисида»ги қарори ижроси доирасида ўтказилган фестивалда ёшлар томонидан яратилган маҳсулотлар кўргазма-ярмаркаси ташкил этилди. Унда бой миллий маданиятимизни ёрқин акс эттирувчи 40 мингга яқин ижод намуналари намойиш қилинди.
— Мактабдан ташқари таълим тизимига илғор педагогик услуб ва замонавий ахборот-коммуникация технологиялари ҳамда ўқитишнинг янги шаклларини жорий этишга алоҳида эътибор қаратилмоқда, — дейди Навоий вилояти халқ таълими бошқармаси ахборот хизмати раҳбари Абдухолиқ Жўраев. — Вилоятда фаолият юритаётган 11 «Баркамол авлод» болалар марказларида зарур шарт-шароитлар яратилган. Ушбу марказлардаги 158 тўгаракда 6 ёшдан 16 ёшгача бўлган 3550 нафардан зиёд ёшлар турли йўналишларда касб-ҳунар ўрганмоқда.
— Фестивалда миллий ҳайкалтарошлик йўналиши бўйича иштирок этдим, — дейди Навоий шаҳридаги 6-умумтаълим мактаби ўқувчиси Аваз Элбоев. — Бундай фестиваллар биз, ёшларнинг ўз иқтидор ва салоҳиятимизни янада юксалтиришда муҳим аҳамият касб этади.
Тадбир шаҳардаги «Амфитеатр» мажмуасида ташкил этилган катта концерт дастури билан якунланди. Унда қатнашган тўгараклар, ижодиёт марказлари ҳамда уларнинг тарбияланувчиларига бир қатор номинациялар бўйича диплом ва эсдалик совғалари топширилди.
Изоҳ (0)