Малайзиянинг йўқолган «Боинг»ини излаш ишлари олиб борилаётган Ҳинд океани ҳудудида мой доғлари топилди, дея хабар бермоқда Agence France-Presse ахборот агентлиги маълумотига таяниб «Кун» нашри. Бироқ қароргоҳи Австралияда бўлган Қидирув ишларини мувофиқлаштириш маркази раҳбари Ангус Ҳюстоннинг 14 апрель, душанба куни айтган сўзларига кўра, доғларнинг қаердан пайдо бўлганини ҳали аниқлаш лозим.
— Австралиянинг Ocean Shield қидирув-қутқарув кемаси мой доғларини кеча кечаси топди. Мутахассислар таҳлил учун ёқилғидан намуна олишди. Ушбу доғлар қаердан келиб қолганини аниқлашимиз учун бизга бироз вақт керак, – дея қайд этди Ҳюстон Австралиянинг Перт шаҳрида бўлиб ўтган матбуот анжуманида.
Унинг маълум қилишича, катта эҳтимол билан йўқолган самолётга тегишли бўлган «қора қутилар» кетма-кет олти кундан бери бирор сигнал бермайапти. Шунинг учун 14 апрель, душанба оқшомидан қидирув ишларига алоҳида ишлайдиган Bluefin-21 сувости қурилмаси жалб қилинади ва у лайнер парчаларини излаш билан шуғулланади. Ҳюстоннинг қайд этишича, қидирувнинг сув остидаги қисми бир неча кун давом этади.
Эслатиб ўтамиз, Куала-Лумпур–Пекин йўналиши бўйлаб MH370 рейсини амалга ошираётган Malaysia Airlines авиакомпаниясининг Boeing 777-200 самолёти 8 мартга ўтар кечаси радарлардан йўқолган эди. Самолёт бортида 239 киши бўлган.
Изоҳ (0)