Одесса фашист босқинчиларидан озод қилинганлигининг 70 йиллиги нишонланиши сиёсий зиддиятлар сабабли тўхтатилди. Можаро ва иғволар натижасида Киевнинг янги ҳукумати тарафдорлари ҳам, унга қаршилар ҳам вилоят раҳбарияти билан келишиб, байрамни нишонлашдан воз кечишди. Бу ҳақда «ИТАР-ТАСС» хабар қилмоқда.
Фахрийларни табриклаш учун борган халқ депутати, Украина президентлигига номзод Сергей Тигипкога Евроиттифоққа қўшилиш тарафдорлари тухум отдилар. «Менимча, мамлакатда шундай вазият юзага келганлигига сиёсатчилар айбдор», – дея изоҳлади бу ҳолатни Тигипко. У бўлиб ўтган воқеани «сиёсий иғво», деб атади.
Одессалик намойишчиларнинг яна бир гуруҳи эса «Променад» меҳмонхонасини ўраб олишди. Улар бу ерда президентликка яна бир номзод, халқ депутати Олег Сарев жойлашган, деб ҳисоблашар эди. Намойишчилар миллатчилик руҳидаги шиорларни айтиб бақиришди, сиёсатчини «муносиб кутиб олиш» учун тухум, зелёнка ва бошқа нарсалар тайёрлаб қўйишди.
Депутатни ҳимоя қилиш учун воқеа жойига «Халқ дружинаси» ва Киев ҳукуматига қарши чиқувчи бошқа жамоат ташкилотларининг фаоллари етиб келишди. Оқибатда кўчада муштлашиш бошланди, меҳмонхонага етиб келган милиция ва тўлиқ қуролланган махсус бўлинма ходимлари уларни ажратиб қўйишди.
Тўқнашувлар натижасида бир неча киши жароҳатланди, автомобилларга зарар етди.
Изоҳ (0)