11 апрель, жума куни Европа футбол ассоциациялари уюшмаси (УЕФА)нинг Швейцариянинг Ньон шаҳридаги бош қароргоҳида Чемпионлар Лигаси ҳамда Европа Лигаси ярим финал баҳсларига қуръа ташлаш маросими бўлиб ўтади. Бу ҳақда «ИТАР-ТАСС» хабар берди.
Чемпионлар Лигаси ярим финалига қуръа ташлаш маросимигача икки испан клуби — Мадриднинг «Реал» ва «Атлетико», Лондоннинг «Челси» ҳамда кубокнинг амалдаги соҳиби Мюнхеннинг «Бавария» клублари етиб келишган эди. Яширин қуръа тамойилларига кўра ушбу жамоалар жуфликка бўлинади ва дастлабки ўйинларнинг мезбони аниқланади. Бундан ташқари, мазкур қуръа орқали 24 май куни Лиссабондаги «Да Луш» стадионида бўлиб ўтадиган финал баҳсининг мезбони ҳам аниқланади.
Қуръа ташлаш маросимини УЕФА бош котиби Жанни Инфантино бошқаради. Унга бу ишда ЕЧЛ финали элчиси, яқин ўтмишнинг машҳур футболчиси Луиш Фигу ёрдамлашади.
Ярим финал ўйинлари 22—23 ҳамда 29—30 апрель кунлари бўлиб ўтади.
Айнан шу тизимда Европада нуфузи жиҳатидан иккинчи саналган Европа Лигаси турнирининг ярим финал баҳслари учун ҳам қуръа ташлаш маросими ўтказилади. Ушбу турнирда икки испан жамоаси—«Севилья» ва «Валенсия», Португалиянинг «Бенфика» ҳамда Италиянинг «Ювентус» жамоалари ўз рақибларини билиб олади.
Европа Лигасининг ярим финал баҳслари 24 апрель ҳамда 1 май кунлари бўлиб ўтади. Мусобақанинг финал ўйини 14 май куни Италиянинг Турин шаҳридаги «Ювентус-Арена» стадионида ўтказилади. Европа лигасининг қуръа ташлаш маросимида Жанни Инфантинога финал баҳсининг элчиси, «Ювентус» ва Италия терма жамоасининг собиқ ўйинчиси Чиро Феррара кўмак беради.
Изоҳ (0)