Миржалол Қосимов Ўзбекистон U-22 бош мураббийи этиб тайинлангани ҳақидаги хабар рад қилинди

Миржалол Қосимовнинг олимпия терма жамоасига мураббийлик қилиши ҳақидаги хабар расман тасдиқланмади. Ўзбекистон футбол федерациясининг Twitter’даги саҳифасида маълум қилинишича, Миржалол Қосимов энди фақат миллий терма жамоада фаолият олиб боради. Шунингдек, мураббий олдига Осиё ўйинларида иштирок этадиган терма жамоани бошқариш вазифаси ҳам қўйилган.

Uff.uz таъкидлашича, Олимпия терма жамоаси асосини ташкил қиладиган ва 2016 йилда Бразилияда бўлиб ўтадиган Олимпиадага чиқиш учун кураш олиб борадиган Ўзбекистон U-22 терма жамоасига эса Шуҳрат Мақсудов устозлик қилишда давом этади.

Шунингдек, хабарда қайд этилишича, бу маълумотлар 4 апрель куни ЎФФ Ижроқўм йиғилишида эътироф этилган.

Миржалол Қосимов Осиё ўйинларида иштирок этадиган терма жамоада ҳам бош мураббий сифатида ишлайди.

https://twitter.com/UzbekistanFF/status/453404691087380480

https://twitter.com/UzbekistanFF/status/453404803167559680

Эслатиб ўтамиз, 1991—92 йилларда туғилган ёшлардан иборат терма жамоа сентябрь ойида Кореянинг Инчеон шаҳрида бўлиб ўтадиган Осиё ўйинларида иштирок этади. Таъкидлаш жоиз, Осиё ўйинларида иштирок этадиган терма янгидан тузилади ва бу терма жамоа олдига Инчеонда чемпион бўлиш вазифаси юклатилган.