Фарғонада иқтисодиётимизни ривожлантиришда янги инновацион технологияларнинг ўрни мавзусида илмий-амалий конференция бўлиб ўтди. Бу ҳақда ЎзА хабар берди.
Вилоят ҳокимлиги, вилоят ҳудудий инновация фаолияти ва технологиялар трансфери маркази ҳамкорлигида ташкил этилган тадбирда вилоятдаги олий ўқув юрти профессор-ўқитувчилари, ёш олим ва тадқиқотчилар, талаба-ёшлар иштирок этди.
2014 йилнинг ўтган даврида Фарғона давлат университети 134 миллион, Фарғона политехника институти 167 миллион, Тошкент ахборот технологиялари университети Фарғона филиали 91,8 миллион сўмлик инновацион ишланмаларни амалга ошириш учун турли корхоналар билан шартномалар тузган.
Анжуманда иқтисодиётимиз тараққиётига салмоқли ҳисса қўшадиган янги инновацион технологиялар борасида турли маърузалар тингланди. Айниқса, магистр ва талабаларнинг илмий ишланмалари йиғилганларда катта қизиқиш уйғотди.
– Бугунги кунда муқобил энергиядан фойдаланиш муҳим аҳамият касб этмоқда, – дейди Фарғона давлат университети талабаси Аҳлиддин Қўчқоров. – Ана шуларни ҳисобга олиб, шамол ва сув энергетик қурилмасини яратдим. Қурилма экологик хавфсизлиги, қулайлиги ва бир қатор афзалликлари билан алоҳида аҳамиятга эга.
Тадбир доирасида вилоятдаги олий ўқув юртларининг интеллектуал маҳсулотлари кўргазмаси намойиш этилди.
Изоҳ (0)