Андижон шаҳридаги ихтисослаштирилган теннис мактабида хотин-қизлар ўртасида анъанавий теннис турнири бўлиб ўтди. Бу ҳақда ЎзА хабар берди.
«Соғлом бола йили» Давлат дастури доирасида вилоят хотин-қизлар қўмитаси ташаббуси билан ташкил этилган мусобақада 120 нафарга яқин иштирокчи ғолиблик учун куч синашди.
– Ўзбекистонда яратилаётган кенг шароит ва имкониятлар самараси вилоятимиз спортчилари қўлга киритаётган натижаларда ҳам ўз ифодасини топмоқда, – дейди Андижон вилояти ҳокимининг ўринбосари, вилоят хотин-қизлар қўмитаси раиси Манзурахон Юнусова. – 2013 йилда 4 200 нафардан зиёд андижонлик хотин-қизлар республика ва халқаро миқёсдаги турли спорт мусобақаларида муваффақиятли иштирок этиб, 533 медални қўлга киритди.
Якуний натижаларга кўра ўз гуруҳларида Муштарий Мамажонова, Дилфуза Султонова, Инна Камакина ва Миллана Исмоилова ғолиб деб топилди.