Шу йилнинг 27 март куни Ўзбекистон Республикаси Вазирлар Маҳкамасининг «Тошкентда Инҳа университети фаолиятини ташкил этиш ҳамда унинг моддий-техник базасини шакллантириш чора-тадбирлари тўғрисида»ги Қарори қабул қилинди.
«Норма» нашрининг ёзишича, унга кўра, Тошкент шаҳри Зиёлилар кўчаси 9 ва 13а манзилида жойлашган алоҳида ҳудуд ва муҳандислик коммуникацияларига эга қурилиши тугалланмаган бино баҳолаш қиймати бўйича университетга берилди. Шу муносабат билан Ўзбекистон Фанлар Академияси ҳамда шаҳар ҳокимияти зиммасига Алишер Навоий номидаги тил ва адабиёт институти, Тарих институти ҳамда «Фан» нашриётини бошқа жойга кўчириш вазифаси юклатилди.
Объектлар сотилишидан тушган маблағлар Фанлар Академиясининг махсус ҳисоб рақамига йўналтирилади. Улар академиянинг фундаментал кутубхонасини ташкил этиш, шунингдек академия негизидаги илмий муассасаларнинг илмий ва моддий-техник базасини мустаҳкамлаш, юқори технологик илмий мосламалар билан жиҳозлаш каби ишлар учун мўлжалланган. Кейинчалик Фундаментал кутубхонадан университет ҳам фойдаланади.Университет талабини ҳисобга олган ҳолда, 2014 йилнинг охиригача унинг ўқув комплексини кенгайтириш, янги объектлар, хусусан талабалар учун ётоқхона барпо этиш, жалб этиладиган хорижлик мутахассислар учун қулай шароит яратиш билан боғлиқ таклифлар кўриб чиқилади.
Шунингдек, ҳукумат қарорида университет фаолиятини йўлга қўйиш режаси ҳам тасдиқланди. Унга мувофиқ, таълим жараёни учун Корея Республикасидан юқори малакали мутахассислар жалб этилади. Маҳаллий ўқитувчилар эса Инҳа университетида малака оширишлари учун Кореяга юборилади.
Бундан ташқари, шу кунларда бакалавриат йўналиши бўйича қабул режаси ва унинг талаблари ишлаб чиқилиши жараёни кетмоқда. Университетга қабул қилиш оммавий ахборот воситаларида эълон қилинади. Режага мувофиқ, абитуриентлар учун тайёрлов курслари ташкил этилади. Абитуриентларнинг тест ва суҳбат ҳамда қабул имтиҳонлари июль ойида ўтказилади.
Янги университетда таълим жараёни шу йилнинг 1 октябридан бошланади.
Изоҳ (0)