Сентябрь ойида Жанубий Кореянинг Инчхон шаҳрида бўлиб ўтадиган Осиё ўйинларида иштирок этадиган Ўзбекистон-U22 терма жамоасига бош мураббий этиб Миржалол Қосимов тайинланди. Бу ҳақда «Оламспорт» маълум қилди.
«Championat.asia»нинг хабар беришича, Қосимовга худди миллий терма жамоада бўлгани каби Шуҳрат Мақсудов ёрдам беради.
Бу терма жамоанинг дастлабки йиғини июнь ойида бўлиб ўтиши режалаштирилган. Ёзги йиғин давомида ўртоқлик ўйинлари ўтказилиши кўзда тутилган. Айни пайтда бир нечта терма жамоалар билан музокаралар олиб борилмоқда.
Миржалол Қўшоқовичнинг таъкидлашича, терма жамоа мураббийлар штабида яна бир мураббий иш бошлайди. Яқин кунларда бу мутахассиснинг номига ойдинлик киритилади. Кўп эҳтимол билан бу мутахассис шу ёшдаги футболчилар билан ишлаган мураббий бўлади.
Инчхондаги Осиё ўйинларида 1991, 1992, 1993 йилда туғилган футболчилар иштирок этади. Бундан ташқари, мусобақа регламентида уч нафар ёши катта футболчининг қатнашишига ҳам рухсат этилган. Қосимов бундай имкониятдан фойдаланади.
Фақат Осиё ўйинлари ФИФА кунига киритилмагани учун легионерлар масаласида муаммо юзага келади. Бунда маҳаллий ёши катта футболчиларнинг Кореяга бориш эҳтимоли юқори бўлади.
Изоҳ (0)