Покистоннинг Лахор шаҳрида тўққиз ойлик болани судга чақиришди. У қасддан одам ўлдиришга уринишда айбланмоқда. Бу ҳақда «Gazeta.ru» хабар берган.
Гап шундаки, полиция ва газ таъминоти корхонаси ходимлари ёқилган газ учун пул тўланмаслик ҳолатларини аниқлаш ва қарзларни ундириш учун рейд уюштиришган. Шунда бошқа оила аъзолари қатори тўққиз ойлик Мусохон ҳам уларга тош отиб, яралаганликда айбланмоқда.
3 апрель – пайшанба куни судда бу иш бўйича илк эшитув бўлганида, судья айбланувчининг гўдак эканлигини кўриб, ҳайрон қолган. У болани айблаб билдирги ёзган полиция ходимини ишдан четлатиш ҳақида фармойиш бериб, Мусохонни гаров эвазига қўйиб юборган. Аммо бир ҳафтадан кейин у яна асосий суд йиғилишига келиши талаб этилади.
Мусохоннинг қариндошлари ва адвокат полиция ходимини малакасизликда айблашмоқда, унинг айблови мамлакат қонунчилигига ҳам тўғри келмайди. Чунки Покистонда 12 ёшгача бўлган шахслар жиноий жавобгарликка тортилиши мумкин эмас.
«У ўзи сут шишасини кўтара олмайди-ю, қандай қилиб полициячига тош отиши мумкин?» – дейди Мусохоннинг буваси.
Изоҳ (0)