Тошкент марказий кўчаларида 85 та янги турдаги матбуот дўконлари ўрнатилди
«Матбуот тарқатувчи» аксионерлик компанияси томонидан босма оммавий ахборот воситалари маҳсулотларини янада ривожлантириш, нашрлар обуна нархларини арзонлаштириш, газета ва журналларнинг ўз вақтида муштарийларга етиб боришини таъминлаш бўйича амалга оширилаётган чора-тадбирлар муҳокамасига бағишланган матбуот анжумани ўтказилди. Бу ҳақда компания матбуот маркази хабар берди.
Тадбирда «Матбуот тарқатувчи» аксионерлик компанияси бош директори Сувон Нажмиддинов таъкидлаганидек, компания тизимидаги корхоналарда вақтли матбуот нашрларини истеъмолчига тез ва сифатли етказиб бериш ҳамда аҳолига қўшимча хизматлар кўрсатиш сифатини янада такомиллаштиришни таъминлаш мақсадида «2011—2014-йилларда вақтли нашрларни тарқатиш тармоғини замонавийлаштириш ва хизматларнинг янги турларини жорий этиш дастури» қабул қилиниб, режалаштирилган ишлар амалга ошириб келинмоқда.
Маълум бўлишича, дастур доирасида тармоқдаги киоскаларнинг 737 таси жорий ва 218 таси капитал таъмирланди, маркетинг тадқиқотларига асосан аҳоли гавжум жойларга 128 дона янги киоскалар жойлаштирилди ҳамда пойтахтимиз марказий кўчаларида янги типдаги киоскалардан 85 донаси ўрнатилди.
Вақтли матбуот нашрларини муштарийларга тарқатишда компанияда 14 та вилоят почта алоқаси филиаллари, «Халқаро почтамт» филиали, барча туман почта боғламаси ва алоқа бўлимлари билан ҳамкорлик йўлга қўйилган.2014-йил обунасини уюштиришда муштарийларга янада кўпрок қулайлик яратиш мақсадида аҳоли гавжум ва ташкилотлар кўп жойларда жойлашган 840 та «Матбуот» киоскалари орқали вақтли матбуот нашрларига обуна қилиш ташкил қилинди.
Таъкидлаш лозимки, обуна тўловларини пластик карточкалар орқали қабул қилишни ташкиллаштириш мижозларга қулайлик яратади. Шу муносабат билан компания шохобчаларида терминаллар сони 273 тага кўпайтирилди.Шунингдек, чакана савдо тизимида ўтган йиллар давомида 134 турдаги китоб маҳсулотлари савдога чиқарилган бўлса, бугунги кунда 1400 га яқин ҳар хил турдаги китоб маҳсулотлари тармоқ киоскалари орқали харидорларга тадим этилмоқда.
