Европа Чемпионлар лигаси мусобақасининг чорак финалидан ўрин олган ўйинлар давом этади. Бугун, 2 апрел куни тунда футбол ишқибозлари ҳукмига иккита учрашув ҳавола этилади. Бу ҳақда «Уфф.уз» хабар берди.
Улардан бири Испания пойтахти Мадрид шаҳрида бошланади. Маҳаллий «Реал» жамоаси Дортмунднинг «Боруссия» клубини қабул қилади.
Айнан ушбу жамоалар ўтган йили ярим финалда ҳам бир-бирларига рўбарў келган эди. Ўшанда икки ўйин натижасига кўра, немис клуби финалга йўл олган эди.
Иккинчи учрашув Франсия пойтахти Париж шаҳрида бўлиб ўтади. Унда «ПСЖ» жамоаси Лондоннинг «Челси» клубига мезбонлик қилади.
Эслатиб ўтамиз, бугунги ўйинлар Тошкент вақти билан соат 23:45 да бошланади.
«Спорт» телеканалидаги манбамиз хабарига кўра, Тошкент вақти билан 23:45 да «Реал»—«Боруссия» ўйини тўғридан-тўғри эфирга узатилади. «ПСЖ»—«Челси» ўйини эса аввалги учрашув тугаши билан намойиш қилинади.