Futbol bo‘yicha 2026-yilgi Jahon chempionati Osiyo mintaqasidagi 3-saralash bosqichidan o‘rin olgan uchrashuvlarning 3 va 4-tur o‘yinlari o‘tkaziladi. Unda O‘zbekiston milliy jamoasi Eron va BAA terma jamoalarini Toshkentda “Bunyodkor” stadionida qabul qiladi.
Ijtimoiy tarmoqlarda ushbu o‘yinlarda Srechko Katanes sog‘lig‘idagi muammolar sabab qatnasha olmasligi, uchrashuvlarda Kapadze bosh murabbiy sifatida ishlashi haqida gaplar tarqaldi. O‘FA xalqaro aloqalar bo‘limi rahbari Sherzod Igamberdiyev jurnalist Narzulla Saydullayevga ushbu xabarlar haqiqatga to‘g‘ri kelmasligi, O‘zbekiston milliy terma jamoasi bosh murabbiyi bugun, 7-oktyabr kuni Toshkentga yetib kelishini ma’lum qilgan. Ammo bu xabar ham o‘z tasdig‘ini topmadi.
O‘FA matbuot xizmati Srechko Katanes salomatligi yomonlashgani sababli shifokorlar tavsiyasiga ko‘ra ushbu yig‘inda qatnasha olmasligini ma’lum qildi. Ikkita uchrashuvga jamoani yordamchi murabbiylar Aleish Chex hamda Vlado Radmanovich tayyorlaydi.
Avvalroq Katanes sog‘lig‘idagi muammo sabab jamoani uchinchi bor tark etsa, qaytib kelmasligini ma’lum qilgandi.
Ma’lumot uchun, bugundan jamoa Toshkentda mashg‘ulotlarga kirishadi va 10-oktyabr kuni Eronga qarshi maydonga tushadi. BAA bilan o‘yin 15-oktyabrga rejalashtirilgan.
Izoh (0)