Qashqadaryo viloyatida sudya yordamchisi sifatida ishlagan fuqaro uni ishdan bo‘shatgan sud raisini sudga berdi. Bu haqda Telegram kanallarida xabar tarqaldi.
Ma’lum bo‘lishicha, sobiq sudya yordamchisi Fuqarolik ishlari bo‘yicha Qarshi tumanlararo sudi raisi buyrug‘ini bekor qilish uchun aynan shu sudning o‘ziga murojaat qilgan.
Da’vo arizasida yozilishicha, ishdan bo‘shatilgan sudya yordamchisi Qarshi tumanlararo sudida 2023-yilning 3-aprel kunidan shu lavozimda ish boshlab, 2024-yilning 13-mayidan esa devonxona xodimi sifatida faoliyat yuritgan.
Fuqarolik ishlari bo‘yicha Qarshi tumanlararo sudining 6-sentyabrdagi 48-sonli buyrug‘iga ko‘ra Mehnat kodeksining 161-moddasi 5-bandiga muvofiq ishdan bo‘shatildim. Ish beruvchi tomonidan biror marta ham intizomiy javobgarlikka tortilmaganman, deydi da’vogar da’vo arizasida.
Arizada yozilishicha, Qarshi tumanlararo sudi raisi O‘ral Ne’matillayev yordamchisiga ariza yozasan deya bosim o‘tkazgan. Biroq yordamchi buni rad etgan.
O‘ral Ne’matillayev 2024-yilning 19—20-avgust kunlari meni ishga chiqmagan deb Kasaba uyushmasiga taqdimnoma kiritgan. Men esa o‘sha kuni to‘liq ishda o‘tirib, Adolat axborot tizimlar kompleksiga shaxsiy elektron imzom orqali 213 ta ariza, da’vo arizalar, 20-avgust kuni ham 228 ta ariza va da’vo arizalarni kirim qilganman, deydi sobiq sudya yordamchisi da’vo kiritar ekan.
Da’vogarning qo‘shimcha qilishicha, sud raisi uni ishdan bo‘shatish uchun 3 kun oldin ogohlantirish berib, bu haqda yig‘ilish qilishi va uni rasman ogohlantirishi lozim bo‘lgan. Biroq bunday qilinmagan.
Qashqadaryo viloyat sudi axborot xizmatining “Daryo”ga bildirishicha, mazkur da’vo arizasi adolatni ta’minlash, ishning haqqoniy ko‘rishilishiga erishish uchun boshqa sudga yuborilishi mumkin.
Izoh (0)