Shavkat Mirziyoyev va Gurbanguli Berdimuhamedov 14-oktyabr kuni telefon orqali muloqot qildi.
Prezident matbuot xizmatining ma’lum qilishicha, O‘zbekiston va Turkmaniston yetakchilari ikki tomonlama kun tartibidagi dolzarb masalalarni muhokama qildi.
Prezident Turkmaniston yetakchisini shoir va mutafakkir Maxtumquli Firog‘iyning 300 yillik yubileyiga bag‘ishlangan xalqaro forum muvaffaqiyatli o‘tkazilgani bilan yana bir bor tabrikladi hamda Ashxobod shahrida ko‘rsatilgan samimiy qabul uchun minnatdorlik bildirdi.
Yaqindagi uchrashuvda erishilgan kelishuvlardan kelib chiqib O‘zbekiston—Turkmaniston strategik sheriklik va ko‘p qirrali hamkorlik munosabatlarini yanada rivojlantirish va mustahkamlashning dolzarb masalalari ko‘rib chiqildi.
O‘zbekiston va Turkmaniston yetakchilari bo‘lajak tadbirlar rejasini ham muhokama qildi.
Shavkat Mirziyoyev 2024-yilning fevralida “Buyuk turkman shoiri va mutafakkiri Maxtumquli Firog‘iy tavalludining 300 yilligini keng nishonlash to‘g‘risida”gi qarorni imzolagandi. Turkmaniston Xalq maslahati raisi Gurbanguli Berdimuhamedov ushbu qaror uchun minnatdorchilik maktubi yo‘llagandi.
O‘zbekiston prezidenti 11-oktyabr kuni Ashxobod shahrida turkman shoiri va mutafakkiri Maxtumquli Firog‘iy tavalludining 300 yilligiga bag‘ishlangan “Zamon va sivilizatsiyalarning o‘zaro bog‘liqligi — tinchlik va taraqqiyot asosi” mavzusidagi xalqaro forumda ishtirok etdi. Davlat rahbari Maxtumqulining 300 yillik yubileyi munosabati bilan medal bilan mukofotlandi.
Shavkat Mirziyoyev tadbir doirasida Turkman xalqining milliy yetakchisi bilan uchrashib, unga Maxtumqulining o‘zbek tilida nashr etilgan tanlangan asarlari to‘plamini sovg‘a qildi.
Izoh (0)