Rossiya prezidenti Vladimir Putin Ukrainaning fuqarolik infratuzilmasiga zarba berishni to‘xtatish taklifini o‘rganishini aytdi. U buning uchun Kiyev bilan to‘g‘ridan to‘g‘ri muzokaralar olib borish kerakligini istisno qilmadi. Bu haqda “Interfaks” xabar berdi.
Ukraina prezidenti Vladimir Zelenskiy avvalroq Kremlga “fuqarolik infratuzilmasiga uzoq masofali dronlar va raketalar orqali har qanday hujumlardan 30 kun muddatga, keyinchalik uzaytirish imkoniyati bilan, voz kechishni” taklif qilgan edi.
Bu masalani hal qilish kerak, chunki bu — sinchkovlik bilan o‘rganilishi lozim bo‘lgan mavzu, ehtimol, ikki tomonlama tarzda ham, dedi Putin.
Kreml matbuot kotibi Dmitriy Peskovning aniqlik kiritishicha, Putin aynan Ukraina bilan muzokaralarni nazarda tutgan.
Shu bilan birga, Rossiya prezidenti Ukraina go‘yoki fuqarolik obyektlaridan harbiy maqsadlarda foydalanayotganini aytdi va 13-aprel kuni Sumi viloyatiga Rossiya armiyasi tomonidan berilgan zarbani esladi.
Mana, masalan, qurolli kuchlarimizning Sumi viloyatidagi kongress-markazga bergan zarbasi hammaga yaxshi ma’lum. Bu fuqarolik obyektimi yoki yo‘qmi? Fuqarolik. Ammo u yerda Kursk viloyatida jinoyat sodir etganlarni taqdirlash marosimi bo‘lib o‘tdi, dedi Putin.
35 kishi, jumladan, bolalar qurbon bo‘lgan raketa hujumini Rossiya prezidenti “haqli qasos” deb atadi.
Bu aynan ularni jazolash uchun qilingan, deya ta’kidladi u.
Sumi ma’muriyati 13-aprel kuni shaharda Ukraina Qurolli kuchlari jangchilarini taqdirlash marosimi bo‘lib o‘tganini tan oldi va ulardan kamida ikki nafari halok bo‘lganini ma’lum qildi. Biroq, rasmiylarga ko‘ra, qurbonlarning aksariyati tinch aholi vakillari bo‘lgan, chunki harbiylar boshpanaga tushishga ulgurgan.
Sumi viloyati harbiy ma’muriyati rahbari Vladimir Artyux shaharda harbiylarni taqdirlash rejalashtirilganini tasdiqladi. Shundan so‘ng prezident Zelenskiy o‘z farmoni bilan Artyuxni ishdan bo‘shatdi.
Putin, shuningdek, 4-aprel kuni Krivoy Rogga uyushtirilgan hujumda 21 kishi, jumladan, to‘qqiz bola halok bo‘lganini nazarda tutgan holda, qandaydir restoranga zarba berilgani haqida gapirdi.
Restoranda yig‘ilishlar, uchrashuvlar, harbiylar maslahatlar o‘tkazadi, bayram qilishadi, aroq ichishadi va hokazo. Ana o‘sha joyga ham zarba berildi. Bu fuqarolik obyekti emasmi? Fuqarolik. Ammo nishon kim edi? Harbiy, dedi u.
Rossiya Mudofaa vazirligi Krivoy Rogga zarba berish maqsadi go‘yoki ukrainalik harbiylar “g‘arb instruktorlari” bilan to‘plangan “Magellan” restorani bo‘lganini da’vo qildi. Biroq bu versiyaga hech qanday dalil yo‘q.
Ukrainada “Pasxa sulhi”
Rossiya prezidenti Putin 19-aprel kuni Pasxa bayrami munosabati bilan 19-aprel soat 18:00 dan 21-aprel soat 00:00 gacha sulh e’lon qildi. Ushbu 30 soatlik davrda Rossiya qo‘shinlariga barcha jangovar harakatlarni to‘xtatish buyurildi, deb xabar berdi Kreml matbuot xizmati.
Ukraina prezidenti Vladimir Zelenskiy armiya bosh qo‘mondoni Aleksandr Sirskiyning hisobotiga tayanib, Rossiya shturmlar uyushtirish, o‘qqa tutish va dronlardan foydalanish orqali o‘zi e’lon qilgan sulhni 2000 martadan ortiq buzganini ta’kidladi.
Shunga qaramay, 20-aprel, yakshanba kuni havo tahdidi haqida hech qanday ogohlantirish berilmadi, dedi Zelenskiy.
Rossiya tomoni, o‘z navbatida, Ukraina Qurolli kuchlarini “Pasxa sulhi”ni ko‘p marta buzganlikda aybladi. Shundan so‘ng Ukraina rahbari fuqarolik obyektlariga uzoq masofali dronlar va raketalar bilan 30 kunga hujum qilmaslikni taklif qildi.
Izoh (0)