Farg‘ona viloyatida fuqarolarni Rossiya-Ukraina urushiga jo‘natishga uringan taksi haydovchisi ushlandi. Oliy sud matbuot kotibi unga nisbatan e’lon qilingan sud hukmini “Daryo”ga taqdim etdi.
Keltirilishicha, sudlanuvchi F.X. 2024-yil yanvar oyida O‘zbekiston fuqarolarini Rossiya va Ukraina o‘rtasidagi harbiy harakatlarga jalb qilish maqsadida Rossiya fuqarosi va boshqalar bilan oldindan jinoiy til biriktirgan. Shartnoma bilan Rossiyaga ishga qabul qilingan va jo‘natilgan har bir fuqaro uchun sudlanuvchidan 1000 AQSH dollari olishi kerak edi.
F.X. O‘zbekiston fuqarosiga oyiga 1500–2500 dollar maosh, Rossiya fuqaroligi, harbiy bilet, kiyim-kechak, unvon, rasmiy ishga joylashish va qurolli mojaroda qatnashgani uchun imtiyozli kredit va’da qilgan. Farg‘onadan Moskvaga aviachipta ham sotib olgan. Farg‘ona aeroportida O‘zbekiston fuqarosini jo‘natib yuborish vaqtida qo‘lga olindi.
Sudda ayblanuvchi urush bo‘lgan hududga o‘zi borib, o‘zi rahbarligida O‘zbekiston fuqarolaridan iborat qurilish guruhini tuzmoqchi bo‘lganini, Rossiya fuqarosi Rossiyaga kirishiga qo‘yilgan taqiqni olib tashlashga yordam berishiga umid qilganini aytgan. Shuningdek, Rossiya fuqarosi unga WhatsApp orqali urush zonasida non yopishni yoki qurilishda ishlashi mumkinligini aytganini ham keltirgan.
U, shuningdek, taksichilik bilan shug‘ullanib, yo‘lovchi bo‘lib chiqqan va chet davlatlarida ishlash niyati bor shaxslarga rossiyalik tomonidan aytilgan ish va takliflarni aytib, bir nechta shaxslar bilan telefon raqamlarini almashgan.
Ayblanuvchi sud hukmi bilan 7 yil 1 oy muddatga ozodlikdan mahrum qilindi.
Suriyadagi jangovar harakatlarda ishtirok etib kelayotgan andijonlik 42 yoshli erkak qidirilmoqda. Shuningdek, Suriyadagi terrorchilik tashkiloti aʼzosi bo‘lgan andijonlik erkakka ham qidiruv e’lon qilingan.
Izoh (0)