Toshkent shahrining Yunusobod tumanida fuqaro o‘yinchoq to‘pponcha bilan bankni o‘marmoqchi bo‘ldi. Bu haqda voqeaga guvoh bo‘lgan “Daryo” o‘quvchisi xabar berdi.
Taʼkidlanishicha, Yunusoboddagi banklardan biriga kirib, to‘pponcha bilan fuqarolarni qo‘rqitgan shaxs qo‘lga olingan.
“Trastbank” matbuot xizmati bank xizmatlari markaziga uyushtirilgan bosqinchilik harakati yuzasidan izoh berdi.
Maʼlum qilinishicha, 18-aprel kuni soat 16:30 dan 17:00 gacha bo‘lgan vaqt oralig‘ida “Trastbank” XABning Yunusobod tumani “Moyqo‘rg‘on” ko‘chasi 39-uyda joylashgan “Turkiston” BXMiga nomaʼlum shaxs tomonidan hujum uyushtirilgan. Ushbu shaxs qora niqob kiygan holda dastasi qora izolyatsion lenta bilan o‘ralgan soxta quroldan foydalanib, bosqinchilik harakatini amalga oshirmoqchi bo‘lgan.
Biroq bank xodimlari tomonidan yuborilgan favqulodda qo‘ng‘iroq asosida zudlik bilan hodisa joyiga Milliy gvardiya Qo‘riqlash xizmati xodimlari yetib kelib, bosqinchilik harakatini bartaraf etgan va gumondor shaxsni qo‘lga olgan.
Hodisa oqibatida yuqoridagi shaxs tomonidan BXM binosining kirish eshigi oynasiga shikast yetkazilgan. Shuningdek, bank xodimlari va mijozlariga hamda BXM kassasida mavjud bo‘lgan pul mablag‘lariga hech qanday ziyon yetkazilmagan.
Hozirda huquqni muhofaza qiluvchi organlar tomonidan tergovga qadar surishtiruv ishlari olib borilmoqda.
Ushbu xabar soat 20:00 da qayta tahrirlandi – tahririyat
Toshkentda bir guruh shaxslar fuqaroga o‘yinchoq to‘pponcha bilan tahdid qilgani to‘g‘risida xabar berilgandi.
2019-yili Rossiyaning Nijnevartovskiy sudi o‘yinchoq to‘pponcha bilan qurollanib, bankni o‘marmoqchi bo‘lgani O‘zbekiston fuqarosiga hukm o‘qigan edi.
Izoh (0)