O‘zbekistonda endi taʼlim tili o‘zbek tili bo‘lmagan sinf bitiruvchilari ham davlat tilidan imtihon topshiradi. Bu haqda maktabgacha va maktab taʼlimi vaziri Hilola Umarova 22-aprel kuni tegishli buyruq chiqardi.
Umumiy o‘rta ta’lim oluvchilarning yakuniy davlat attestatsiyasi to‘g‘risidagi nizomga kiritilgan o‘zgartirish va qo‘shimchalarga ko‘ra, bitiruvchi sinflarda yakuniy attestatsiya o‘tkaziladigan fanlar ro‘yxati, shakli va muddatlari har o‘quv yilida Maktabgacha va maktab ta’limi vazirligi tomonidan tasdiqlanadi. Bunda ushbu ro‘yxatga ta’lim tili o‘zbek bo‘lmagan maktablar uchun davlat tili majburiy fanlar blokiga kiritiladi.
Yakuniy attestatsiyada kuzatuv kengashi hamda fuqarolarning o‘zini o‘zi boshqarish organlari vakillari jamoatchilik asosida kuzatuvchi sifatida qatnashishlari mumkin.
Xorijiy tillar hamda umumta’lim fanlari bo‘yicha milliy yoki xalqaro tan olingan sertifikatga ega bo‘lgan o‘quvchi yakuniy attestatsiya topshiriladigan fandan ozod etiladi. Bunda, xorijiy tillar hamda umumta’lim fanlari bo‘yicha milliy va xalqaro tan olingan sertifikatlar ro‘yxati Maktabgacha va maktab ta’limi vazirligi tomonidan tasdiqlanadi.
Hilola Umarova O‘zbekistonda endi taʼlim tili o‘zbek tili bo‘lmagan sinf bitiruvchilari ham davlat tilidan imtihon topshirishi haqida 2025-yilning fevralida ma’lum qilgandi. Vazirning 20-fevraldagi buyrug‘i bilan umumiy o‘rta taʼlim muassasalarida yakuniy davlat attestatsiyasi o‘tkazish tartibi belgilandi.
Mazkur hujjatga asosan umumiy o‘rta taʼlim muassasalarida yakuniy davlat attestatsiyasi o‘tkaziladigan fanlar ro‘yxati va imtihon o‘tkazish shakllari, umumtaʼlim fanlari hamda xorijiy tillarni bilish darajasini baholovchi milliy va xalqaro tan olingan sertifikatlar ro‘yxati tasdiqlandi.
Unga ko‘ra, 9-sinf o‘quvchilarining yakuniy davlat attestatsiyasi:
- ona tili va adabiyoti (taʼlim o‘zbek tilida olib boriladigan sinflar uchun) fanidan — yozma;
- davlat tili (taʼlim tili o‘zbek tili bo‘lmagan sinflar uchun) fanidan — yozma;
- matematika fanidan — yozma;
- O‘zbekiston tarixi fanidan — yozma/og‘zaki;
- jismoniy tarbiya fanidan — amaliy shaklda o‘tkaziladi.
11-sinf o‘quvchilarining yakuniy davlat attestatsiyasi:
- ona tili va adabiyoti (taʼlim o‘zbek tilida olib boriladigan sinflar uchun) fanidan — yozma;
- davlat tili (taʼlim tili o‘zbek tili bo‘lmagan sinflar uchun)dan — yozma;
- matematika (asosiy) / matematika (chuqurlashtirilgan) fanidan — yozma;
- tarix fanidan — yozma;
O‘quvchining tanlovi bo‘yicha:
- ona tili va adabiyoti (qoraqalpoq, rus, qozoq, turkman, tojik, qirg‘iz tilida taʼlim bo‘lgan sinflar uchun), biologiya, fizika, kimyo, davlat huquq asoslari, geografiya fanlaridan — yozma;
- chet tili fanidan yozma/og‘zaki shaklda o‘tkaziladi.
Vazirning yangi buyrug‘i e’lon qilingan paytdan boshlab kuchga kirdi.
Izoh (0)