Toshkent shahrida keksa, boquvchisini yo‘qotgan fuqarolarning uyini soxta hujjatlar asosida sotib, fuqarolarga 258 ming dollar zarar yetkazgan jinoiy guruh faoliyatiga chek qo‘yildi. Ularning qilmishi Jinoyat ishlari bo‘yicha Olmazor tuman sudida ko‘rib chiqilmoqda. Bu haqda “Daryo” manbasi ma’lum qildi.
Manbaga ko‘ra, ayni kunga kelib, jinoiy guruhning 21 nafar a’zosi sudda tergov qilib bo‘lingan.
Sud hujjatlariga ko‘ra, guruh a’zolari Toshkent shahrida istiqomat qiluvchi boquvchisini yo‘qotgan, yolg‘iz yashovchi keksa, nogironligi bo‘lgan fuqarolarning ishonchiga kirib, ularning xonadonini soxta hujjatlar asosida sotib yuborishni kasb qilib olgan.
Sudda aytilishicha, mahalla raislari, hokim yordamchilari, maklerlar va profilaktika inspektorlaridan iborat guruh o‘zgalarning 8 ta xonadonini sotib, uy egalariga 258 ming dollar zarar keltirishda ayblanmoqda.
Sud hujjatlarida keltirilishicha, jinoiy guruh a’zolari Toshkent shahrining Chilonzor tumani, Zavqiy ko‘chasida joylashgan 38-uyda yolg‘iz yashab kelayotgan S.Akobirovning ruhiy xastaligi, o‘zining harakatlariga javob bera olmasligi va ojizligidan foydalanib, qalbaki hujjatlar asosida unga tegishli xonadonning mulk huquqni qo‘lga kiritgan. Va ushbu xonadonni 2022-yil 15-iyun kuni xaridorga 153 ming dollarga sotgan. Jinoiy guruh tarkibida MFY raisi, hokim yordamchisi va “uchastkavoy”ning borligi odamlarni ishontirgan. Shu sabab ko‘pchilik aldanib qolgan.
Izoh (0)