Meduza nashri Moskvadagi Gubkin universitetining Toshkent filiali talabasi murojaatini eʼlon qilib, darsdagi maʼruzada talabalarga maxsus harbiy operatsiya va Rossiya Federatsiyasining jasur qo‘shinlari haqida so‘zlab berilganini bayon qildi.
O‘zbekiston fuqarolarining yosh avlodiga ham urush taʼsir qildi. Endi har hafta universitetda bizga maʼruzalar o‘qishmoqda, ularda keksa avlod vakili “SVO” (maxsus harbiy operatsiya) va Rossiya Federatsiyasining jasur qo‘shinlari haqida so‘zlab beradi. Men hanuz din ishlari bo‘yicha markaz xodimining iqtibosini eslayman: “Men qadimgi pravoslav rus madaniyatining tashuvchisi sifatida Rossiya Federatsiyasi qo‘shinlari satanistlarga qarshi kurashayotganini taʼkidlayman”. Bu — safsata, bu — bemaʼnilik. Ukrainadagi urushga biz — mustaqil O‘zbekiston yoshlarining qanday aloqamiz bor?”, deyiladi mazkur maqoladagi chiqishda.
Rossiya davlat neft va gaz universiteti (MTU)ning Toshkent shahridagi filiali bunga munosabat bildirdi.
Joriy yilning 14-aprel kuni ayrim ijtimoiy tarmoqlar va onlayn nashrlarda I.M.Gubkin nomidagi Rossiya davlat neft va gaz universiteti (MTU) Toshkent shahridagi filiali talabasining murojaati eʼlon qilindi. Mazkur murojaat yuzasidan filial maʼmuriyati tomonidan tegishli o‘rganish ishlari olib borildi. Murojaatda nomi tilga olingan shaxs filial talabalari tarkibida mavjud emasligi aniqlandi. Shuningdek, murojaatda keltirilgan dars jarayonlaridagi “targ‘ibot ishlari” haqidagi maʼlumotlar asossiz ekanligi, yaʼni ular haqiqatga to‘g‘ri kelmasligi maʼlum bo‘ldi. Filialda taʼlim jarayoni belgilangan o‘quv rejasi va fanlar dasturi asosida tashkil etilgan, deyiladi filial bayonotida.
Filial OAV bilan ishlashga tayyor ekanini, jurnalistlarga olayotgan maʼlumotlariga aniqlik kiritishga tayyorligini bildirgan.
Filial maʼmuriyati ommaviy axborot vositalari bilan hamkorlikka doimo tayyor ekanini maʼlum qiladi. Shuningdek, OAV va jamoatchilik vakillaridan tasdiqlanmagan, bir tomonlama maʼlumotlarni tarqatmaslikni va rasmiy manbalarga tayanishni so‘raymiz, deydi masʼullar.
Izoh (0)