Tailand Kambodjani qirollik hududida Tailand—Kambodja chegarasi yaqinida piyodalarga qarshi minalar o‘rnatganlikda aybladi. Bu haqda Tailand Tashqi ishlar vazirligining rasmiy veb-saytida e’lon qilingan bayonotda ma’lum qilindi.
Vazirlik ma’lumotlariga ko‘ra, 16-iyul kuni Ubonratchatxani viloyatining Chong Bok tumanida Tailandning 6021-piyoda rotasiga mansub uch askar belgilangan yo‘nalish bo‘yicha rejali patrullik paytida minaga duch kelgan. Tekshiruv natijasida ma’lum bo‘lishicha, bu qirollikda qo‘llanilmagan va saqlanmagan piyodalarga qarshi minalar bo‘lib, ular yaqinda o‘rnatilgani aniqlandi.
“Vakolatli xavfsizlik idoralari tomonidan o‘tkazilgan baholash va aniqlangan dalillar shuni ko‘rsatadiki, ushbu minalarning o‘rnatilishi xalqaro huquqning qo‘pol ravishda buzilishi hisoblanadi. Tailand Qirolligi hukumati piyodalarga qarshi minalar qo‘llanilishini qat’iyan qoralaydi”, deyiladi bayonotda.
Shuningdek, Tailand Kambodjani ikki davlat hukumatlarining ikki tomonlama kelishuviga muvofiq chegara bo‘ylab minalardan tozalash ishlarida hamkorlik qilishga chaqirgan.
28-may kuni Tailandning Ubonratchatxani viloyati va Kambodjaning Prea Vixear viloyati o‘rtasidagi chegaraning bahsli qismida o‘zaro kelishilgan betaraf hududda ikki mamlakat quruqlik qo‘shinlari harbiy xizmatchilari o‘rtasida to‘qnashuv yuz bergandi. O‘n daqiqa davom etgan jangda kambodjalik bir harbiy og‘ir darajada yaralangandi.
Izoh (0)