Sudanning El-Fasher shahrida oziq-ovqat tanqisligi oqibatida atigi bir hafta ichida, asosan ayollar va bolalardan iborat, 63 kishi hayotdan ko‘z yumdi. Bu haqda Arab News xabar berdi.
Sog‘liqni saqlash vazirligi 10-avgust kuni holat bo‘yicha rasmiy bayonot bergan. Unga ko‘ra, bu raqam faqat shifoxonalarga yetib kelgan bemorlarni o‘z ichiga oladi. Qoniqarsiz xavfsizlik sharoitlari va transport vositalarining yetishmasligi sabab ko‘plab oilalar marhumlarni tibbiy yordam so‘ramasdan, bevosita dafn etgan.
Ta’kidlanishicha, Sudandagi ocharchilik qurbonlari sonini tasdiqlash deyarli imkonsiz, chunki ko‘plab tibbiyot muassasalari faoliyatini to‘xtatgan, mamlakatga OAV kirishi esa cheklangan. Avvallari aholi uchun najot bo‘lgan jamoaviy oshxonalar hozirda mahsulot ta’minoti yo‘qligi sabab deyarli butunlay yopilgan. Ayrim oilalar hayvonlar yemiga yoki chiqindi ovqatlarga tayanib kun kechirmoqda.
BMT ma’lumotlariga ko‘ra, El-Fasherda 5 yoshgacha bo‘lgan bolalarning qariyb 40 foizi og‘ir, 11 foizi esa o‘tkir to‘yib ovqatlanmaslikdan aziyat chekmoqda. Avgustda avjiga chiqadigan yomg‘ir mavsumi shaharga yordam yetkazishni yanada qiyinlashtirmoqda — yo‘llarda harakatlanish yomonlashib, ayrim hududlarga kirish deyarli imkonsiz bo‘lib qolgan.
Sudanda 3 yildirki davom etayotgan urush o‘n minglab insonlarning hayotiga zomin bo‘ldi, millionlab odamlarni uy-joysiz qoldirdi. BMTga ko‘ra, mamlakatda misli ko‘rilmagan majburiy ko‘chish va ocharchilik inqirozi yuzaga kelgan. Xususan, El-Fasher 2024-yilning may oyidan buyon paramilitar guruh “Tezkor yordam kuchlari” (TYK) hukmronligi ostida qamalda qolgan. Guruh 2023-yil aprelidan beri Sudan armiyasi bilan kurash olib boradi. El-Fasher armiyada qolgan so‘nggi yirik markaz bo‘lib, hudud so‘nggi kunlarda yil boshida Xartumdan chiqib ketgan TYK tomonidan yana hujumga uchramoqda.
Aprel oyida El-Fasher yaqinidagi Zamzam qochqinlar lageriga uyushtirilgan yirik hujum oqibatida o‘n minglab odamlar uylarini tashlab qochishga majbur bo‘lgan. Ularning aksariyati hozir El-Fasherning o‘zida boshpana topgan.
Ma’lum qilinishicha, bu hafta TYK Xartum g‘arbidagi ikki qishloqqa hujum qilib, 18 nafar tinch aholini o‘ldirgan. Hujum Shimoliy Kordofan shtatida sodir bo‘lgan bo‘lib, bu hudud TYKning Liviyadan yonilg‘i kontrabanda qilishi uchun muhim yo‘l hisoblanadi. “Favqulodda vaziyat bo‘yicha yuristlar” huquq tashkiloti hujumda o‘nlab odamlar yaralanganini, jarohatlanganlar Al-Obeid shahriga davolanish uchun olib ketilganini bildirgan.
Izoh (0)