Isroil bir necha yil davomida Eronga hujum uyushtirish uchun tayyorgarlik ko‘rgan va yuqori lavozimli harbiy amaldorlar hamda olimlar haqida batafsil ma’lumotlar to‘plagan. Bu haqda Isroil xavfsizlik kuchlaridagi manbaga asoslanib, Israel National News xabar bermoqda.
Manbaning aytishicha, Isroil 13-iyunga o‘tar kechasi Eronga qarshi amalga oshirgan Rising Lion operatsiyasi SAHAL, MOSSAD va Isroil mudofaa sanoati o‘rtasidagi yaqin hamkorlikda bajarilgan.
“Ayni paytda, Eronning strategik raketa arsenalini havo hujumlari va yerdagi maxfiy operatsiyalar kombinatsiyasi yordamida zararsizlantirish bo‘yicha yashirin kampaniya ham boshlandi”, deydi manba.
Ta’kidlanishicha, so‘nggi yillarda MOSSAD SAHAL bilan hamkorlikda Isroil mudofaa sektorining ilg‘or texnologiyalaridan foydalangan holda Eronda bir qator maxfiy qo‘poruvchilik operatsiyalarini amalga oshirgan.
“Bu harakatlar Eronning havo hujumidan mudofaalanish va strategik raketa tizimlari sohasidagi imkoniyatlarini bevosita zaiflashtirdi”, degan manba.
Bundan tashqari, MOSSAD maxsus bo‘linmalari Markaziy Erondagi zenit-raketa batareyalari yaqinida yuqori aniqlikdagi qurol tizimlarini oldindan joylashtirgan. Isroil harbiy-havo kuchlari havo hujumini boshlaganida, bu tizimlar faollashtirilgan va bir vaqtning o‘zida aniq zarbalar berib, asosiy hududlarni nishonga olgan.
AQSH prezidenti Donald Tramp 13-iyunga o‘tar kechasi Isroil harbiy samolyotlari Eronga hujum qilishidan bir necha soat oldin xuddi shu vaziyatdan qochishga umid qilganini aytilgandi.
13-iyunga o‘tar kechasi Isroil rejimi Eronga yirik havo hujumi uyushtirdi. Unda ko‘plab tinch aholi, askarlar, harbiy rahbarlar va olimlar halok bo‘lgan. Isroil harbiylari Eronga qarshi “oldindan ogohlantiruvchi” harbiy zarbalar boshlanganini tasdiqlab, zarbalar Tehronning yadroviy obyektlariga, o‘nlab nishonlarga berilganini aytgan.
Izoh (0)