Qirg‘izistonda bo‘lish qoidalarini buzgan shaxslarni mamlakatga 5 yilgacha kiritmaslik bo‘yicha qonun ishlab chiqiladi

Qirg‘izistonda bo‘lish qoidalarini buzgan shaxslarni mamlakatga 1-5 yilgacha kiritmaslik bo‘yicha qonun ishlab chiqiladi. Bu haqda Qirg‘iziston Vazirlar Mahkamasi raisi o‘rinbosari — Milliy xavfsizlik qo‘mitasi rahbari Qamchibek Tashiyev 8-iyul kuni O‘sh viloyatiga qilgan tashrifi chog‘ida maʼlum qilindi, deya xabar bermoqda “Telekanal region”.

Qamchibek Tashiyev “Do‘stlik” bojxona-postida kirib chiquvchilar soni va migratsiya tartibi bo‘yicha qiziqdi. Aytilishicha, mazkur postdan kuniga 20 mingga yaqin shaxs o‘tib-qaytadi. Ertalab asosiy oqim O‘zbekistondan Qirg‘izistonga bo‘ladi. Asosan o‘zbekistonliklar ish, sayohat maqsadida va mehmonga Qirg‘izistonga boradi.

Tartibga ko‘ra, O‘zbekiston fuqarolari 60 kun Qirg‘izistonda vizasiz yurishi mumkin. Buning uchun 5 ish kunida yashash joyi bo‘yicha ro‘yxatga turishi talab etiladi.

Noqonuniy migratsiya bo‘yicha ishlanglar. Shularning barchasini tekshiringlar. Mayli kirsin, O‘zbekiston bizni qo‘shnimiz, ular bilan yaxshi, tug‘ishganlardek muomalada bo‘lishimiz kerak. Biroq bularning barchasi qonunchilik asosida bo‘lishi kerak, dedi Qirg‘iziston Milliy xavfsizlik qo‘mitasi rahbari.

Maʼlumot berishlaricha, “Do‘stlik” bojxona-postida kuniga 10-15 ta holatda Qirg‘izistonda bo‘lish tartibini buzgan o‘zbekistonlik fuqarolar jazoga tortiladi. Huquqbuzar 60 kundan keyin yana mamlakatga qaytib kirishi mumkin.

Qonunni buzib, muddatini o‘tkazib mamlakatdan chiqib ketayotganlarni qaytib kirgizmaslik kerak. Shunday tartib ishlab chiqinglar. Shunday qilmasak, bugun jarimani to‘lab qo‘yib, ertaga yana kiraveradi. Undaylarga, misol uchun, 1-5 yilgacha kirishga taqiq qo‘yish kerak. Shundagina ozayadi, dedi Qamchibek Tashiyev.

Tashiyevning tushuntirishicha, huquqbuzar yana qaytib Qirg‘izistonga kirmoqchi bo‘lganida, “Viza tartibini buzganingiz uchun sizga 1 yoki 3 yilga Qirg‘izistonga kirish taqiqlangan”, deb javob beriladi.

Avvalroq Qamchibek Tashiyev “Do‘stlik” postida Qirg‘iziston va O‘zbekiston o‘rtasidagi “Do‘stlik” chegara bojxona postida korrupsiyaning oldini olish bo‘yicha topshiriq bergani xabar qilingan edi.