Arxeologlar Gvatemalaning shimolida taxminan 3000 yil avval mavjud bo‘lgan mayya shahri xarobalarini aniqladi. Saqlanib qolgan piramidalar va yodgorliklar bu hudud mayyaliklar uchun muhim marosim markazi bo‘lganidan darak beradi. Bu haqda The Guardian xabar berdi.
Mutaxassislar ta’kidlashicha, topilmalar Los Abuelos deb ataluvchi qadimiy shahardan topilgan. Hudud marosimlar uchun markaziy ahamiyatga ega bo‘lganini ko‘rsatadi. Mayya sivilizatsiyasi miloddan avvalgi 2000-yilda paydo bo‘lgan va milodiy 400–900-yillarda hozirgi Meksika, Gvatemala janubi, shuningdek Beliz, Salvador hamda Gondurasning ayrim hududlarida rivojlangan.
Los Abuelos ispan tilidan tarjima qilinganda “buvilar va bobolar” degan ma’noni anglatadi. U Gvatemalaning Peten shahridagi muhim arxeologik yodgorlik hisoblangan Uashaktundan, taxminan, 21 kilometr uzoqlikda joylashgan. Shahar o‘z nomini ushbu joydan topilgan ikkita odamga o‘xshash “ajdodlar juftligi” haykalidan olgan.
Miloddan avvalgi 500–300-yillarga oid deb taxmin qilinayotgan ushbu haykallar ajdodlarga sig‘inish marosimlari bilan bog‘liq bo‘lishi mumkin. Shahar taxminan 16 kvadrat kilometr maydonni egallagan. Uashaktun milliy bog‘i tarkibidagi ilgari kam o‘rganilgan hududlardan birida joylashgan.
Gvatemala va Slovakiya arxeologlari bu yerda klassik davrgacha bo‘lgan davr freskalari va “noyob kanallar tizimi” bo‘lgan 33 metr balandlikdagi piramidani ham topgan.
Izoh (0)