Avstraliyaning Kvinslend shtatida joylashgan Bouen kosmodromidan uchirilgan ilk mahalliy orbital raketa — Eris — havoga ko‘tarilgach atigi 14 soniya ichida qulab tushdi. Bu haqda The Guardian xabar berdi.
Bu baxtsiz hodisaga qaramay, Avstraliya kosmik sanoati ushbu muvaffaqiyatsiz sinovni tarixiy burilish sifatida baholamoqda.
23 metr uzunlikdagi va 30 tonna og‘irlikdagi raketa Gilmour Space kompaniyasi tomonidan ishlab chiqilgan. U uzoq kutilgan parvozdan so‘ng qisqa muddat havoda turib, katta tutun to‘plami ostida yerga qulab tushgan. Ushbu holatni yuzlab qiziquvchilar tepaliklardan kuzatgan, jumladan, “Aussienaut” nomi bilan tanilgan yutuber Josh Keegan ham voqeani jonli efirga uzatgan.
Raketaning ilk parvozi 18 oy kutilib, yaqin kunlargacha ob-havo sharoiti sababli uchirilmay kelinayotgandi. Kompaniya esa bu sinov parvozini katta qadam deb baholamoqda.
“Bu bizning orbital kosmik kemalarni muntazam uchirayotgan 6 ta davlat qatoriga kirishimizga turtki bo‘ladi. Eng muhimi, jamoamiz sog‘-salomat va navbatdagi parvozga tayyor”, deyiladi Gilmour Space bayonotida.
Kompaniya rahbari Adam Gilmour esa ijtimoiy tarmoqlarda shunday izoh qoldirgan:
“Raketa start maydonchasidan ajrala oldi — men bundan mamnunman. Albatta, uzoqroq uchishini xohlagan edim, lekin natijadan qoniqdim”.
Avstraliyadagi yoshlarni kosmos sohasiga tayyorlashga yo‘naltirilgan One Giant Leap Australia Foundation ham Gilmour Space jamoasini tabriklab, shunday dedi:
“Yagona o‘rganish yo‘li — bu xatolar orqali oldinga siljish. Bugun kechagidan ko‘proq bilimga egamiz”.
Ma’lumot uchun, kompaniya may oyida ilk parvozni amalga oshirishni rejalashtirgandi. Avstraliya hukumati Eris loyihasi uchun Gilmour Space’ga 5 million dollar mablag‘ ajratgan. U kompaniyaning keyingi avlod suyuq yoqilg‘ili raketa dvigatelini ishlab chiqishiga xizmat qiladi.
Izoh (0)