Rossiyaning Uzoq Sharqida joylashgan Kamchatka yarimorolidagi “Klyuchevskaya Sopka” vulqoni 8,8 magnitudali kuchli zilziladan so‘ng otilishni boshladi. Bu haqda Rossiya Fanlar akademiyasiga tayanib Anadolu xabar berdi.
Dastlabki ma’lumotlarga ko‘ra, vulqonning g‘arbiy yon bag‘rida qaynoq lava oqimi kuzatilmoqda. Hududda kuchli yorug‘lik, chaqnash va alanga qayd etilmoqda. Rossiya hukumati yarimoroldagi maktablarga o‘quv jarayonini vaqtincha to‘xtatib turishni buyurgan.
Yevrosiyo qit’asidagi eng baland faol vulqon
“Klyuchevskaya Sopka” (Klyuchevskoy) — Kamchatka yarimorolining sharqiy qismida joylashgan faol vulqon bo‘lib, u Yevrosiyo materigidagi eng baland va faoli sanaladi. Uning yoshi taxminan 7000 yilga teng. Vulqon balandligi dengiz sathidan 4688 dan 4750 metrgacha o‘zgarib turadi.
Kamchatkadagi zilzila: 8,8 magnituda va kuchli aftershoklar
Kamchatka yarimorolida 30-iyul kuni 8,8 magnitudali kuchli zilzila sodir bo‘lgandi. AQSH Geologik xizmati xabariga ko‘ra, yer silkinishi Petropavlovsk-Kamchatskiy shahridan 119 km janubi-sharqda, taxminan 20 km chuqurlikda sodir bo‘lgan. Asosiy zilziladan keyin hududda yana 6,9 va 6,3 magnitudali aftershoklar (ikkinchi darajali yer silkinishlari) qayd etilgan.
Ma’lumot uchun, Kamchatka dunyodagi “olov halqasi” deb ataladigan geologik faol mintaqaning bir qismidir. Bu hudud Tinch okeani hududida joylashgan va ko‘plab yirik vulqonlar va zilzilalar aynan shu yerda yuz beradi.
Izoh (0)